Read Masana NULLA 18 Bible Online

NULLA 18 - Masana bible

NULLA 18

¹Tam ma ŋolla vi sa gi nulla. Ma sunda vi Ma-Vatɗina, vi David, nam gi nul namna kayni tam Ma-Vatɗina, hay li ma Ma-Vatɗina butum goy hay ɓam sa gawt kalam kafna, hay ɓam Sawul kaw, nam di'e:

²Ma-Vatɗina, donota vanu, nan minaŋu.

³Ma-Vatɗina mi hiɗiyna vanu, mi gulmunna ma duura vanu, mi sa ma butan goyna kaw. Lawna vanu, hiɗiyna vanu ma nan ŋay tuwan talamna. Kuroŋŋa vanu, miyok ma su'da vanu, simdira ma nan ŋay goy hayamna.

⁴Nan min yi sem Ma-Vatɗina, nam nagawa kay sa suburumu. Nala nan ma suɗ goy hay ɓam sa gawt kanna.

⁵Zigew ma mitta sleway tanu, niy-ɓatna vi ɓulak-goyta lanawa nari.

⁶Zigewna vi liyna vi mitta slewi tanu, jawta vi mitta cukawa gaa kanu.

⁷Hay li ma nan ka vun zlata, nan yum selemu, nan siwel tam Lawna vanu. Goy hay Mulda valam pa nam human delanu, siwelda vanu co talamu, hay humumu.

⁸Hay na'ta nagata geɗiya, jiriya kaw, sem hiɗiyn kaf jiriya, wir gigik' gigik', kay mige nam muɗi ɦiya.

⁹No'osna may goy hay cinam pa, kuta may goy hay vunam pa kay ŋal slen goyo, veŋŋa ma kuwa ka yak goyo.

¹⁰Nam mar dukalawna gaa goboyo, nam jikay gaa'a, ɗugul ma diɓilikŋa ay gaa kuɗ selemu.

¹¹Nam ay fili kay kerubena*, nam pir kulo'o, nam ka dol kulo jar simeɗna.

¹²Nam kot jufunda ki liyn ma ŋayna valamu, guɗukŋa ma ŋuyi talamna, niy ma jufunu hiɗi ɗugul ma dibilikŋa ay ŋuyi talamu.

¹³Ɗugulla ka yak goyo jar wileta ta tuɗ vokomta, ka yak mogoyna hiɗi veŋ ma kuta goy vokomu.

¹⁴Ma-Vatɗina baya hay dukalawna, ma Kulo-Jamna hin sa humum delemu, hiɗi mogoyna hiɗi veŋ ma kuta kaw.

¹⁵Nam ɓe ɓarawta valamu, mer sa gawt kanna goyo, nam li wileta ŋolo ŋolo kay viy hagat goy kirsiya.

¹⁶Hay na'ta naga ma gaa kuɗ niy-lumna vul tuwam goyo, sem nagat ma tuni gaana vul tuwam goyo, kuɗ bayta vaŋ naŋ Ma-Vatɗina, kuɗ suwana vi suk ma cinaŋŋa.

¹⁷Ay kulo pa nam meɗ ɓalamay goyo, nam vanu, nam slan goy hay niy-lum ma ŋolla pa;

¹⁸nam butan goy hay ɓam sa gawta sa dono suwanu, hiɗi sa gaw kanu sa ay dono suwanu.

¹⁹Nisi co kanu hay li ma nan ka vun zlata, may Ma-Vatɗina muɗi mi dolla vanu.

²⁰Nam kalanay goy hay liy ma ŋaana, nam suɗan goyo kay nan kiram ŋaa'a.

²¹Ma-Vatɗina lan ŋaa'a kuɗ ɗigerta vanu, nam wurakanu kuɗ ɓan ma muzi goy cet-cetna.

²²Kay nan vi kuɗ hagata vi Ma-Vatɗina, nan may li va ma joo tam Lawna van noŋɗi.

²³Kay vun-ma-gatna valamu kaf ay vok iranu, yoboy ma gatta valam kaf nan rawam goyɗi.

²⁴Nan ay bay-joota vok iramu, nan ŋom tuwan ŋaa'a kay sulukŋa van kafe.

²⁵Kay na'ta Ma-Vatɗina wurakanawa kuɗ ɗigerta vanu, kuɗ ɓan ma muzi goy cet-cet' vok iramna.

²⁶Tam sa ŋaana naŋ ɗek ŋaata vaŋ goyo, tam sa ɗigera naŋ ɗek ɗigerta vaŋ goyo.

²⁷Tam sa peldetna naŋ ɗeksi peldetta vaŋu, tam sa gunina naŋ ɗeksi ki naŋ guni nala.

²⁸Sum sa hot yisi gaana naŋ suɗsi goyo, may sa sli yam tuwsi kulona naŋ hotsi yisi gaa'a.

²⁹Awa, naŋ hin fitilla vanu li haraŋi, Ma-Vatɗina Lawna vanu muɗ jufunda van goy haraŋi.

³⁰Kay hiɗi naŋu nan jaŋ kuɗ vok-ma-duura, Hiɗi Lawna vanu nan ɦal kulo kay gulmunna.

³¹Kay hagata vi Lawna ka haraŋi, yoboyna vi Ma-Vatɗina waki-wak, namu mi kuroŋŋa vi nisi kaf sa zamam ɓalamu.

³²Lawna nam mi gige? Mi Ma-Vatɗinɗi su? Hiɗiyna mi gige? Mi Lawna vay kepɗi su?

³³Lawna mi ma jun furan hiɗi donota, mi ma tun vokan hay hagata ɗigerta kaw.

³⁴Nam kotan senu ki sem dukga nala, nam colan kulo kay liy ma boŋoloŋŋa.

³⁵Nam hat ɓanu kay duura, ta-ta bigiyanu muɗi dono'o kay nir ɓarawta ta tuni kay diŋ-diŋ ma wayna.

³⁶Naŋ vulan marayta vi su'da vaŋawa, ɓaŋ ta jufta ka van kulo'o, nan muɗi ŋolo kuɗ ŋaata vaŋu.

³⁷Naŋ beɗ hagat goy vokanu, senu as zlargat goyɗi.

³⁸Nan min jaŋ kuɗ sa gawt kanna sa piriya, nan ma fisiya kaw, nan as hotayɗi ta-ta nan vatsi goy kafe.

³⁹Nan min cisiya ta-ta nisi as kay yaw kuloɗi, nisi ma puk gaa kuɗ senu.

⁴⁰Kay naŋ junan furanawa hiɗi donota kay duura, nisi sa yaw kulo kanu naŋ ma yaksi gaa'a.

⁴¹Naŋ hin sa gawt kanna muɗan ŋorsiya, kay nan vat sa gawt kanna goy kafe.

⁴²Nisi siwela, may sa ma hulotsi goy mayɗi, nisi siwel tam Ma-Vatɗin kaw nam may humsiɗi.

⁴³Nan lutsi goyo ki kutna ma simeɗna dolom goyo nala. Nan kosi goyo ki gesna hay hagata vi hoyok-ziyna nala.

⁴⁴Naŋ suɗan goyo kay nefta vi sumuna, naŋ muɗan mul ŋolla vi jaf-sumuna, jaf-sum sa nan wisiɗina muɗi sunanu.

⁴⁵Nan di vunan kep kayn nisi hum de', gurona vi sum sa pulla ka giɗelan delanu.

⁴⁶Gurona vi sa ma pulla donota visi vatiya, tuwsi ka visi bat-bat' goy bugol gulmunna visiya.

⁴⁷Bolda ka kay Ma-Vatɗina, bolda kay hiɗiyna vanu. Gajijita ŋolda tam Lawn ma su'da vanu.

⁴⁸Lawna mi ma joban yanna, mi ma hot yam sumun gaa kuɗanu.

⁴⁹Naŋu mi ma suɗan goyo kay sa gawt kanna, naŋ muɗan kulo ŋolo kay sa gawt kanna. Naŋ suɗan goy hay ɓam sa ma waskayna.

⁵⁰Kay na'ta nan min suburaŋu jar jaf-sumuna, nan min subur semda vaŋu hiɗi nulla.

⁵¹Nam vul butta-goyta ŋolda mi mulla valamu. Nam li ŋaata tam falamna ma mul ɦoki kamna. Tam David pa, tam jafna valamu kaw ta-ta hay vatɗita.