Read Masana NULLA 19 Bible Online

NULLA 19 - Masana bible

NULLA 19

¹Tam ma ŋolla vi sa gi nulla. Nulla vi David.

²Dukalawna ɗek goy kay gajijita vi Lawna, liyn ma wiŋŋa ɗek goy kay lopna vi ɓalamu.

³Fatta kepta kus yoboyn tam fatta heta, henjeta kepta ɗek wida va' tam henjeta heta.

⁴Yoboy ma di may hayɗi, vun ma law mayɗi kaw, delem may hum goyɗi.

⁵Delem kalawa goy hay nagata pete, yoboyna valamu tam vun dabaŋ-gu'ta vi nagata pete. Hay kayni nam kot guɗukŋa kay fatta.

⁶Fatta ki mul-cata ma kali goy hay ziyda valam pa nala, Jaŋ jaŋŋa va'a ki sa ma kol kay jaŋŋa nala.

⁷Na' may goy hay vun dabaŋ-gu'ta vi dukalawn pa, vat yam tu'da va' hay vun dabaŋ-gu'ta vi dukalawn hena. Va ma ŋay tuwam kay zalla va'a mayɗi.

⁸Vun-ma-gatna vi Ma-Vatɗina pasiyaki, nam sleɗ ciwta vanu, di-goyta vi Ma-Vatɗina ti gasita, na' muɗ sa yal kiɗayna goy yal hetet'.

⁹Ɗota-gatta vi Ma-Vatɗina ɗigere, na' muɗ dikga firiya, vun-ma-gatna vi Ma-Vatɗina peldete, nam muɗ ira haraŋi.

¹⁰Narta kuɗ Lawna na' peldete, na' col ɗeŋe ta-ta hay vatɗita. Vun-ma-gatna vi Ma-Vatɗina nam gasiya, nam ɗigere kafe.

¹¹Na' ŋaa'a ŋolo suw ora, Awa, suw ora ma ŋaa'a ŋolo. Jibet suw yumda, yumda ta tol gaa'a.

¹²Sunda vaŋu fi gatta kuɗum kaw, sa ma vi kuɗumna fi wurakŋa ŋolo.

¹³Sa ma wi joota ta nam la' bay-minda mi gige? Gan sulukŋa van ma ŋayayna goy gi' ge.

¹⁴Ŋom sunda vaŋu kay sa subur tuwsina, hin sulukŋa li gaŋeraŋ kanɗi. Nala nan ma muɗ ɗigere, mus bay joota, bay raw-goyta kaw.

¹⁵Hin yoboy ma vunanu hiɗi varta vi dikan kiraŋ ŋaa'a, Ma-Vatɗina, hiɗiyna vanu hiɗi sa ma butan goyna.