Read Masana NULLA 22 Bible Online

NULLA 22 - Masana bible

NULLA 22

¹Tam ma ŋolla vi sa gi nulla. Hiɗi «duk ma ŋarpita»[4] Nulla vi David.

²Lawna vanu, Lawna vanu, naŋ hinanawa goyo kay mige? Naŋ min kal goy gine'e bay gut kuɗanu, bay hum tiyta van kaw su?

³Lawna vanu, nan siwel hay falayta, may naŋ humɗi, hay henjeta kaw nan may fi tun sukɗi.

⁴May naŋ ka peldete. Naŋ musi kulo jar liyn ma suburta vi Israyel.

⁵Sumayma ay zamaŋ ɓaŋu, nisi ay zamaŋ ɓaŋu, naŋ suɗsiya kaw.

⁶Nisi ay siwel taŋu, nisi ay suɗi goyo; nisi ay zamaŋ ɓaŋu, nisi muɗ zulo noŋɗi.

⁷May nanu, nan mi jufulu, may mi saɗi. Sumuna ŋulanu, sa nagatna ay ɗuwan birek-ceke kaw.

⁸Nisi kaf sa ɗuwanu cen kuɗan ŋolo, nisi har vunsi goy tan witit', gla yisi katan kaɓa-kaɓa' di'e:

⁹Hinaŋ tuwaŋ hay ɓam Ma-Vatɗin tige, hinim suɗaŋ goy tige, hinim butaŋ goyo la nam minaŋu.

¹⁰May naŋu mi ma kalanay goy hay sun pa, ma hinan tun suk ŋaa'a hay dig sunu.

¹¹Kalaf hay suni pa naŋ ay mi ma ŋomda vanu, kalaf hay suni pa naŋ ay mi Lawna vanu.

¹²Mus gine hiɗi nanɗi kay lasta ka goboyo, kay sa mara ma gut kuɗan mayɗi kaw.

¹³Luway-gujuna ŋolo ŋuyanawa, luway-guju ma donona vi Basan ŋuyanawa cusl'.

¹⁴Nisi mal vunsiyawa goy katanu, ki zlo ma mut muura ci gum nala.

¹⁵Nan muɗi ki niyn ma jaŋ goyo nala, zokan pet gaɗay goy hay gaslamu, dikanu muɗi ki diyakŋa nala, nam ka ɦuwal gaa hayanu.

¹⁶Dekdelan soy goy ɗeŋe ki deheleŋŋa nala, sinanu zlubaki kulo kuɗ narɗakanu; naŋ buranawa hay buɗufna vi mitta.

¹⁷Kay durnayna ŋuyanawa, tokŋa vi sum sa joona ŋuyanawa. Nisi con ɓanu hiɗi senawa.

¹⁸Nan fi ŋa zokan goy kafe, may nisi hayɗin ɗuwan ɗuwi ɦawa.

¹⁹Nisi ɓuraw sligara vanawa jarsiya, sligar-tuwna vanu nisi cum dana'a jar-tuwsiya.

²⁰May naŋu, Ma-Vatɗina, naŋ col goy gine'e hiɗi nanɗi, naŋu mi donota vanu, naŋay gosoyo kay gut kuɗanu.

²¹Ŋom ciwta vanu kay kew-gaferaŋa, ŋom irita vanu kaw kay donota vi durnayna ŋomge.

²²Suɗan goy hay vun zlona, butan goy vun miyok funna. Naŋ hotan ditawa.

²³Nan min di goy kay semda vaŋu jar ɓosiyonna, hay jar tapna nan min suburaŋu.

²⁴Nigi kaf sa li nar kuɗ Ma-Vatɗina, suburumu, nigi sa hay jafna vi Yakub kaf, vulgi gajijita talamu. Jiriygi, nigi jafna vi Israyel kaf.

²⁵Kay sa ma hay hawta nam may ɗuwum birek-cekɗi, nam may pananɗi kaw, ŋay tuwam kalamɗi kaw, may hay li ma sa ma hawn siwel talamu, nam humumu.

²⁶Nan ma suburaŋu jar tokŋa ma ŋolla, slen ma nan yi kanu nan ma hobom vunam vok ir sa li nar kuɗaŋu.

²⁷Sa ziy-zlata ma ti'e hoba kaw, nisi sa gar Ma-Vatɗina ma suburumu. Hin dikgi mus iri dok-doko.

²⁸Vun dabaŋ-gu'ta vi nagat kaf, humsi ma gisi kay Ma-Vatɗina, nisi ma muɗ talamu, jaf-sumuna kaf ma girif gaa vokaŋu kaw.

²⁹Kay mulda kayni vi Ma-Vatɗina, namu mi mulla vi jaf-sumun kafe.

³⁰Nisi ma ti'e, ma girif gaa vokomu kaw, sum sa ŋulona vi nagat kuɗulu. Nisi ma dab voksi gaa vokomu. Nisi sa as ŋom irita visiɗi.

³¹Jafsiya ma sunumu, labara vi Bum-Sumuna ma kusis goy tam jafsi voksi kaw.

³²Nisi ma co'o kay di goy kay ɗigerta valamu tam jaf-sum sa min vuɗa, kay Ma-Vatɗina li kaynawa.