Read Masana NULLA 28 Bible Online

NULLA 28 - Masana bible

NULLA 28

¹Nulla vi David. Ma-Vatɗina, nan ka siwel kayn taŋ naŋu. Hiɗiyna vanu, ŋel humaŋ goy katanɗi, kay mige, la naŋ human delanɗi, nan ma muɗ ŋiray ca ki nisi sa jik gaa hay zulda nala.

²Humaŋ del siɗawta vanu hay li ma nan siwel taŋu, hay li ma nan yaw ɓan kulo'o vok liyna vaŋ ma peldetna.

³Zlatan goyo hiɗi sa jiw-zlatnɗi, nisi sa li joota, sa law hiɗi vunsiya kay toyta tam sugolsiya, may joota ka hay diksiya.

⁴Naŋ ma wuraksi kuɗ lopna visiya, kuɗ joota ta nisi li'e. Wuraksiya kuɗ lopna vi ɓisiya, vulsi wurakŋa vi lop ma nisi lumna.

⁵Kay ŋalda visi may tuni kay lopna vi Ma-Vatɗinɗi, nisi may var kay lopna vi ɓalamɗi kaw, hinim ɦosi gaa'a, hinsi in kulo loɗi.

⁶Gi-deɓta tam Ma-Vatɗina, Kay nam hum della vi siɗawta vanu.

⁷Ma-Vatɗina mi donota vanu hiɗi kuroŋŋa vanu, dikan viy kuɗumu, nan fi gutdawa kuɗumu kaw; firita ka hay dikanu, nan suburumu hiɗi nulla.

⁸Ma-Vatɗina mi donota vi sumuna valamu, namu mi hiɗiyna ma but falam ma mul ɦoki kalamna goyo.

⁹Suɗ sumuna vaŋ suɗge, gi bol kay vocota vaŋu, ŋomsiya, ziysiya kaw ta-ta hay vatɗita.