Read Masana NULLA 32 Bible Online

NULLA 32 - Masana bible

NULLA 32

¹Nulla vi David. Sle'ta ka kay sa ma fi gidawa kay raw-goyta valamu. Sa ma sulukŋa valamu ɦasay goy ɦas.

²Sle'ta ka kay sa ma Ma-Vatɗina ŋa jiw-zlata kalamɗi, sa ma ɗutta may hay dikamɗi.

³Hay li ma nan ziŋa, zokan tiyofi goyo, nan busa tiy he'.

⁴Hay falayta hiɗi henjet kaf ɓaŋ buri nek kanu, donota vanu vatay goyo ki hay fat karaŋga nala. Gi-suk.

⁵Nan ham sulukŋa van goy vokaŋu, jiw-zlata vanu nan ŋaya'ɗi kaw. Nan di'e: Nan min ham raw-goyta vanu goy vok Ma-Vatɗina. Naŋ sli nekka vi sulukŋa vanawa goyo. Gi-suk.

⁶Kay na'ta gigekaw ma vi kuɗaŋu as siɗawaŋu hay li ma nam as faŋu. Gasiya, hay li ma niyn ma ŋulona hob kulo'o kaw, niyn as co talamɗi.

⁷Naŋu mi liyn ma ŋayna vanu, naŋ min koɗan ŋarak kanu kay joota, naŋ min ŋuyanu hiɗi nul ma su'da. Gi-suk.

⁸Nan min ɗekaŋu, hataŋ kaw kay hagata ta naŋ ma tuɗ haya; nan min ɗekaŋ yali, cuk iran kaŋu.

⁹Nigi ma li ki kulumna hiɗi kulum-kurona ma yalla valam mayɗina naɗi. A vum gaa kayni cuk jaman vunamu, kayni ti ganta valamu, la naɗi nam as co taŋɗi.[5]

¹⁰Sa ma jiw-zlata ma fi lasta ŋolo, may sa ma zam ɓam Ma-Vatɗina, nam ma ŋuyum hiɗi slugota.

¹¹Firigiya hay Ma-Vatɗina nigi sa ɗigera, siwelgi hiɗi firita, nigi kaf sa dikgi ɗigera.