Read Masana NULLA 33 Bible Online

NULLA 33 - Masana bible

NULLA 33

¹Firigi hay Ma-Vatɗina, nigi sa ɗigera, nul ma suburta kayni ŋaa'a kay sa diksi ɗigera.

²Suburgi Ma-Vatɗina hiɗi dilla, gigi nul ma suburta hiɗi dil ma zigewna valam doogo.

³Gigi nul ma wuliya talamu, Cigi dil ma jifiya hiɗi nul ma suburta.

⁴Kay yoboyna vi Ma-Vatɗina nam ɗigere, lopna valamu kaf li kayni hay gasita kaw.

⁵Nam min gasita hiɗi lop ma ɗigera kaw. ŋaata vi Ma-Vatɗina hob nagatawa kafe.

⁶Liyn ma dukalawna ay liya hiɗi yoboyna vi Ma-Vatɗina, vok-ma-duura visi kaf ay koti hiɗi sukŋa vi vunamu.

⁷Niy-lum ma ŋolla nam tokom kulo yam tuwamu, zul ma wiŋŋa nam dukum vunam kulo'o.

⁸Hin nagata pet li nar kuɗ Ma-Vatɗina, sum sa hay nagat pet, hin tuwsi wirsi kay narta ta kuɗumta.

⁹Kay nam di yoboyna, van li'e, nam di lawta, van cola kaw.

¹⁰Ma-Vatɗina ɓulak ŋra-vunda vi jaf-sumuna, nam muɗ varta vi sumuna goy waa'a kaw.

¹¹Ŋra-vunda vi Ma-Vatɗina col dono'o ta-ta hay vatɗita, varta vi dikamu col dono'o tam jafsi pa, ta-ta tam jafsi voksiya voksiya.

¹²Sle'ta ka kay jaf-sum sa Ma-Vatɗina mi Lawna visiya, sum sa nam vileksi goyo kay vocota valamu.

¹³Ma-Vatɗina ɗuw ay kulo hay wuralawn pa, nam ɗuw gaa kay gurona vi sumun kafe.

¹⁴Goy hay liyn ma musta valam pa, nam ɗuw gaa kay nisi sa ka kay nagata.

¹⁵Nam ma li diksi kafna, nam ɗuw lopna visi kaf.

¹⁶Mulla may fi su'da kuɗ sojena valam sa ŋollaɗi, sa ma juf ma duura fi su'da hiɗi donot ŋoldaɗi kaw.

¹⁷Kulumna may as kay suɗ san goyɗi, hiɗi donota valam pet nam as but san goyɗi.

¹⁸Ir Ma-Vatɗina ka cuki kay nisi sa li nar kuɗumu, nisi sa cub slugota valamu.

¹⁹Kay suɗ ciwta visi goy vun mitta, kay ŋomsi iriya jar mayta ŋolda kaw.

²⁰Ciwta vuma'a ka cub Ma-Vatɗina, namu mi gutda vuma'a hiɗi kuroŋŋa vuma'a.

²¹Kay dikma ma firiya hiɗi namu, kay numa zam ɓam semda valamu ta peldetta.

²²Ma-Vatɗina hin slugota vaŋu mus kuma' musge, kay numa ka hiɗi cubta-sle'ta kuɗaŋ naŋu.