Read Masana NULLA 34 Bible Online

NULLA 34 - Masana bible

NULLA 34

¹Nulla vi David, hay li ma nam muɗ tuwam ɦay-ɦaya vok Abimelek hay li ma nam kaliya, Abimelek digiɗimu.[6]

²Nan min subur Ma-Vatɗina hay liyn kaf, gi-deɓta talamu ma li hay vunanu.

³Hin ciwta vanu subur tuwa'a hay Ma-Vatɗina, hin sa zigin-zlata hum kayni li firi kaw.

⁴Suburgi Ma-Vatɗina hiɗi nanu. Nay tapay vunaya sli semda valam kulo'o.

⁵Nan gar Ma-Vatɗina, nam humanawa kaw, nam suɗanawa goyo kay narta van pete.

⁶Hay li ma san ɗuw kulo talamu, nam muɗ firi ŋolo, iram muɗ zulo noŋɗi.

⁷Hay li ma sa ma hawn siwela, Ma-Vatɗina huma, nam suɗum goyo kay lasta valam pete.

⁸Sunda-wuralawna vi Ma-Vatɗina ŋuy liyna vi nisi sa li nar kuɗumu, nam suɗsiya kaw.

⁹Nigi ma jugo'o, Nigi ma wi ŋaata vi Ma-Vatɗina kaw a nam ŋaa'a. Sle'ta ka kay sa ma ŋay tuwam talamu.

¹⁰Ligi nar kuɗ Ma-Vatɗina, nigi sa peldetna valamu. Kay nisi sa li nar kuɗumu, sle ma ŋom ŋil tuwsi ma bay fum mayɗi.

¹¹Guro-zlona galakŋ lumu, mayt cum kaw, may nisi sa gar Ma-Vatɗina, ŋaat ta nisi fa'ɗi tayɗi.

¹²Nigiyaya, nigi gurosgurayna, humgi kuɗanu, nan min hatgi narta kuɗ Ma-Vatɗina.

¹³Sa ma min irita mi gige? Sa ma min ɦur buura valamu kay hob hiɗi ŋaata-ŋolda mi gige?

¹⁴Ŋom sinaŋu kay joota, ŋom vunaŋu kaw, kay di ɗutta.

¹⁵Hin joot goy gine'e, laŋ ŋaata, garaŋ toyta, tuɗ kuɗa'a hiɗi dono'o kaw.

¹⁶Ir Ma-Vatɗina ka cuki kay sa ɗigera, humam jaki tam tiyta visiya.

¹⁷Ma-Vatɗina muɗ iram goy kay sa li joota, kay gaa hay nagata hum sa'a ma gum kisi loɗi.

¹⁸Hay li ma sa ɗigera siwela, Ma-Vatɗina huma. Nam suɗsi goy hay lasta visi kaf kaw.

¹⁹Ma-Vatɗina ka goboy hiɗi nisi sa diksi kusiya, nam suɗ nisi sa ŋusta visi maŋay goyo.

²⁰Lasta co kay sa ma ɗigera kuɗ jafa' ŋolo, may Ma-Vatɗina suɗum goy haya' kafe.

²¹Nam ŋom zokomu kaf, kep kaw ma kus goy jaramu mayɗi.

²²Joota ma ci sa jiw-zlatna goyo, nisi sa ka gawt kay sa ma ɗigera kitat ma ko kisiya.

²³Ma-Vatɗina ma but ciwta vi sa sunda valam goyo, nisi kaf sa ŋay talamu kitat ma visiɗi.