Read Masana NULLA 39 Bible Online

NULLA 39 - Masana bible

NULLA 39

¹Tam ma ŋolla vi sa gi nulla, tam Yedutun,[7] Nulla vi David.

²Nan di'e: Nan min ŋom tuwan kay hagata ta nan tuɗ haya'ta, kay nan ma li suluk hiɗi vunanɗi, nan min ŋom vunanu hay li ma sa jiw-zlata ka vok iran tuwa.

³Nan min di vaɗi, nan musi ŋal kiliŋ, nan duk vunanu, may nan ka hay lasta, tuw-tita van tay kiɗayɗi.

⁴Dikanu ka ŋal hayan kalafi, hay li ma lawt co hay vunanu, kuta ka waran hayan kalafi.

⁵Ma-Vatɗina, hinan wi dabaŋ-gu'ta vanu, ŋaɓta vi buura vanu nam gaage? Hinan wi a nanige buura van may ŋolɗi.

⁶Ɗuwaŋu, naŋ ka buura vanu ki beɗna vi way-ɓamta nala, irita vanu ka vok iraŋu ki vaɗi nala. Awa san gigekaw poy kilan nam ki simeɗ ɦawa nala. Gi-suk.

⁷Sana poy kayn ŋray ca ki ɗuŋus ɦawa nala, nam mak tuwam ɦawa, nam tok slena, may sa ma yawam kalafi nam wumɗi.

⁸May wulini Bum-Sumuna nan cub mige? Cubta-sle'ta vanu ka hay naŋu.

⁹Suɗan goy kay kurut-tuwta van kafe, hinan muɗ goy zulo'o vok sa ɦay-ɦaynɗi.

¹⁰Nan ziŋa, nan mal vunan goyɗi, kay naŋ li va'a.

¹¹Yaw watta vaŋ goy kanu, nan muɗi goy waa'a kay watta vaŋu.

¹²Hay li ma naŋ gat sana hiɗi sum-zlata kay jiw-zlata valamu, hay na'ta naŋ vat jifiyta valam goyo ki fotna nala, Awa, san gigekaw mi simeɗ ɦawa, Gi-suk.

¹³Ma-Vatɗina, hum siɗawta van humge. Muɗ humaŋ tam siwelda vanu kaw, mus kiliŋ vok tiyta vanɗi, kay nanu mi sa ma pulla vok iraŋu, sa ma pulla ki sumiyan kaf nala kaw.

¹⁴Cuk iraŋ kuɗanɗige, hinan gi suk hinge, jew a nan tuɗ goyo, jew a nan may loɗi.