Read Masana NULLA 48 Bible Online

NULLA 48 - Masana bible

NULLA 48

¹Nulla vi gurona vi Kore.

²Ma-Vatɗina nam ŋolla, tam namu suburta ŋolo hay hoyok-ziyna vi Lawna vaya, kay hiɗiyta peldetta valamu.

³Hiɗiy na'ta jifiy ŋolo, na'a ti firita vi nagat kuɗulu, hiɗiyta vi Siyon; gala' ma gaana, kayni mi hoyok-ziyna vi mul ma ŋolla.

⁴Lawna, hay ziyn ma mulda valamu, san wumu ki liyn ma ŋayna nala.

⁵Kay ɗuwgiya, muliyan ŋra vunsiyawa, nisi tapi kuɗ tuwsiya.

⁶Nisi wi'e, nisi muɗi nari, narta nig gaa kisi ŋolo, nisi piri gosoyo.

⁷Ɗawni tuwsi tun caw visi bat-bat', ki tuw-tita vi cata ta min puka nala.

⁸Nisi digiɗiys goyo ki digiɗsi mi birin ma may kuɗuw pa, ma kus lumayna vi Tarsis goyo nala.

⁹Ki nay humiya, nay wiy kaw ala hoyok-ziyna vi Ma-Vatɗina Lawna vi vok-ma-duura, hoyok-ziyna vi Lawna vay kayni, Lawna kotom dono'o ta-ta hay vatɗita. Gi-suk.

¹⁰Lawna, numa'a var kay ŋaata vaŋu jar Tempella vaŋu.

¹¹Lawna, semda vaŋu ka fi suburta ta-ta hay vun dabaŋ-gu'ta vi nagata; ɓaŋ ta jufta hobay hiɗi ɗigerta.

¹²Hin hiɗiyta Siyon li firiya, hin guro-boyna vi Yuda li firiya kay kitana vaŋu.

¹³Poygi hay Siyon, ŋuygi hayam ma kalafna, ŋagi simdira valamu.

¹⁴Ɗuwgi gulmunna valam ŋaa'a, Ɗuwgi ziy ma hay kalafna valam ŋaa'a, kay nigi fi di goy kalamu tam jaf ma vokayna.

¹⁵Kay Lawna kayni nam mi Lawna vaya ta-ta hay vatɗita. Nam mi ma ŋomaya ta-ta nay raw hay mitta.