Read Masana NULLA 49 Bible Online

NULLA 49 - Masana bible

NULLA 49

¹Tam ma ŋolla vi sa gi nulla. Nulla vi gurona vi Kore.

²Humgi slen kayni, nigi sumun kafe, muɗgi humgi tanu, nigi kaf sa ka kay nagata.

³Nigi sa gurayna hiɗi sa ŋulona, nigi sa farayna hiɗi sa hawna kafe.

⁴Vunan min di yoboy ma yalla, nan ka hiɗi varta ta hay liya'ta hay dikanu.

⁵Nan min jak human tam law ma nir niramna ma may goy vunan pa. Nan min gi nul hiɗi law namna hiɗi dilla.

⁶Nan ma li nari hay buur ma joona, hay li ma joota vi sa ka gawt kanu ŋuyanu kay mige?

⁷Nisi sa zam ɓam farayna visiya, subur tuwsiya kay mayanda visiya kaw.

⁸Sana as kay but ɓasulumna goyɗi, nam as kay vul gurjut kalam mi Lawna kay butum goyɗi.

⁹Kay butta-goyta vi ciwta vi sana kayn lop ŋolo, kayni fi liɗi ta-ta hay vatɗita.

¹⁰Nisi ma mus iri dok-dokɗi, nisi ma tel tuwsi kay zuldaɗi kaw.

¹¹Kay nisi ma wa'a: Sa ma yalla as mita, sa ma ɦay-ɦayna hiɗi sa ma to'ofayna mit goy lay, Farayna visiya nisi hinim mi sum sara'a.

¹²Varta vi diksi kep ɦawa'a, ala ziyna visiya ma col dono'o ta-ta hay vatɗita, ziyn ma musta visiya tam jafsi lo jafsi lo. Nisi yi nagata visiya kuɗ semda visiya.

¹³Nir na'ta kep sana hay gajijita valamu fi mus ta-taɗi, Nam ŋray ca hiɗi muura ma san ŋatam goyo.

¹⁴Hagata ta nisi va' kisit kayni ti hay-ɦayta visiya; may nisi sa co bugolsina darta visi min ɓak ma hay vunsina. Gi-suk.

¹⁵Ki farana vi fok-dimin nala, nisi tuɗ gaa hay liyna vi sa mitina, mitta ti vuna' hiɗi nisiya, sa diksi ɗigera ma li gaŋeraŋ kisiya hay grawta, liyna vi mitta ma ɓulak jifiyta visiya, ta-ta muɗ ɗawni, liyn ma musta visi hay kuta.

¹⁶May Lawna min suɗ ciwta van goyo kay donota vi liyna vi mitta, kay nam min naran talamu. Gi-suk.

¹⁷Naŋ ma li narɗi hay li ma san ka muɗ faraya, hay li ma faray ma hay ziyna valamu ka biya ŋolo;

¹⁸kay hay li ma nam mit ɗawni, nam fi yaw va kuɗumɗi, farayna valamu as kal gaa kuɗumɗi kaw.

¹⁹La nam hay irita valamu subur ciwta valamu kaw, sumuna ma suburaŋu hay li ma naŋ vul ŋaata mi tuwaŋu,

²⁰Hiɗi kayn kaf naŋ ma tuɗ tam liyn ma sumiyaŋ ka lakay haya, nisi sa irsi ma wi haraŋa loɗi.

²¹Sa ma ka hay gajijita, may yalda valam mayɗina, nam ŋray ca ki muura ma ŋatam goyna nala.