Read Masana NULLA 5 Bible Online

NULLA 5 - Masana bible

NULLA 5

¹Tam ma ŋolla vi sa gi nulla. Hiɗi zlekemna. Nulla vi David.

²Ma-Vatɗina, jak humaŋ tam yoboyna vanu. Humaŋ tiy-tuwta van humge.

³Naŋ mulla vanu hiɗi Lawna vanu, jak humaŋ tan siwelda vanu. Kay nan siɗaw kayn taŋ naŋu.

⁴Ma-Vatɗina, hay graw culumta naŋ human delanu, hay graw culumta nan min mar siɗawta vokaŋu, nan min zamaŋ ɓaŋu kaw.

⁵Kay naŋu may mi Lawna ma firi hay jiw-zlatɗi, sa ma joona fi mus hiɗi naŋɗi kaw.

⁶Sum sa ɦay-ɦayna fi lak kulo vok iraŋɗi, kay naŋ ka gawt hiɗi nisi kaf sa li jiw-zlata.

⁷Nisi sa ka sinda naŋ hinsi mit goyo, sa ɦok busuwn goyna hiɗi sa ɗutna kir Ma-Vatɗin liwisi.

⁸May nanu, kuɗ ŋaata vaŋ ta ŋolda, nan min kal hay ziyna vaŋu, nan min girif gaa'a vok Tempel ma peldetna vaŋu, hiɗi narta kuɗanu.

⁹Ma-Vatɗina, tunan iran hay ɗigerta vaŋu, kay sa gawt kanna ka'a, kot hagata vaŋ goy ɗigere vokanu.

¹⁰Kay gasita tay hay vunsi loɗi, haysi hobawa hiɗi mileta, delsiya ki zulda ta mali goyt nala, yoboy ma golɓotna ka hay vunsiya.

¹¹May naŋ Lawna ma ka kitat kisiya ki sum sa joon nala, hin varta visiya cuksi gaa'a. Naŋ ma cuksi gaa jar sulukŋa visiya, ma san as ŋaɓamɗina. Kay nisi yawawa kulo kaŋu.

¹²Ki kayn nala nisi sa ŋay taŋu ma li firiya, nisi ma siwel hiɗi firita dok-doko, kay naŋ koɗsi ŋarak kisiya. Nisi kaf sa min semda vaŋu ma li firiya hayaŋu.

¹³Kay naŋ Ma-Vatɗina min gi bolo kay sa ma ɗigera, naŋ ŋuyumu hiɗi slugota vaŋu ki kuroŋŋa nala.