Read Masana NULLA 51 Bible Online

NULLA 51 - Masana bible

NULLA 51

¹Tam ma ŋolla vi sa gi nulla. Nulla vi David.

²Hay li ma Natan ma jobta co talamu, bugol nam bur hiɗi Bat-Seba burna.[13]

³Lawna, lan slugota kuɗ ŋaata vaŋu lige. Kuɗ slugota vaŋ ta ŋolda, ɦas kurut-tuwta van goy ɦasge.

⁴Muzan goy cet-cete kay jiw-zlata vanu, lan peldete kay sulukŋa vanu kaw.

⁵Kay nan wi raw-goyta vanu, sulukŋa vanu ka vok iran dok-doko kaw.

⁶Nan li sulukawa kataŋ naŋ kepe, nan li sle ma joowa vok iraŋu. Kay naŋ ka ɗigere hay dita vaŋu, kitata vaŋu hay liya'a kaw.

⁷Ɗuwaŋu, nan vuɗi hay jiw-zlata, sunu sli haya hiɗi nanu hay sulukŋa kaw.

⁸May naŋ min gasita hay dikga kalafi, nala hin gasita kal hay dikan kalafi.

⁹Poran goyo hiɗi hisop*, nala nan ma muɗ peldete, muzan goyo, nala nan ma muɗ haɓ tal-tal ki mogoyn nala'.

¹⁰Hinan hum del nulla hiɗi firita kaw, nala zokan ma naŋ kusumna ma li firiya.

¹¹Muɗaŋ iraŋ goy tam sulukŋa vanu, ɦas jiw-zlata van goy kafe.

¹²Lawna, li dikga ta peldete hayanu, kot ŋusta gasita ta wuliya lo hayanu.

¹³Gan goy gine'e vok iraŋɗi, yaw Ŋusta-Peldetta goy kanɗi kaw.

¹⁴Vulan firita vi su'da vaŋ lo, ŋomanu hay ŋusta ta min hum ŋaa'a.

¹⁵Hay na'ta nan min hat hagata vaŋu mi sa raw-goyna, sa sulukŋa ma muɗ irsi taŋu kaw.

¹⁶Lawna, Lawna ma su'da vanu, butan goyo kay busuw ma ɦokom goyna. Nala vunan ma subur lamanda vaŋu.

¹⁷Bum-Sumuna, malan vunan goyo, nala vunan ma sli semda vaŋ kulo'o.

¹⁸Lali dikaŋ min ɗifinna ni, nan ɗawn vulaŋga; may naŋu, naŋ min ɗifin ma ŋal-goynɗi.

¹⁹Ɗifinna ma kir Lawn ŋaan kayni, ti dikga ta kusiya. Lawna, dikga ta kusiya, ta min hamda kaw kayni may kiraŋ jooɗi.

²⁰Laŋ ŋaa'a tam Siyon kuɗ slugota vaŋu, inaŋ gulmunna vi Yerusalem kulo'o.

²¹Kay na'ta naŋ min li firiya hiɗi ɗifinna vi ɗigerta, kay ɗifin-ma ŋal-goyna hiɗi ɗifin ma tuwam petna. Ki kayn nala nisi ma ŋat luway-jufayna kulo kay giwin-ma-ɗifinna vaŋu.