Read Masana NULLA 55 Bible Online

NULLA 55 - Masana bible

NULLA 55

¹Tam ma ŋolla vi sa gi nulla. hiɗi dilla ma zigewn talamna. Nulla vi David.

²Lawna, muɗaŋ humaŋ tam siɗawta vanu, ŋay tuwaŋ goy kay siɗawta vanɗi.

³Jak humaŋ tanu, hum siɗawta vanu kaw. Nan ka tilar goy hay liyn kaf, nan ka ɦiwira,

⁴Kuɗ della vi sa gawtna, kay joota vi sa jiw-zlata. Kay nisi zut joot kanu, nisi pi lawt kanu hay ɦiyda kaw.

⁵Dikan ka tan ŋolo, narta ŋolda vi mitta nig kanu.

⁶Narta hiɗi wir-tuwna vanawa, tuwan ka van bat-bat' kaw.

⁷Nan di'e: La li gilaŋatna van ka'a ki gukka nala, nan min pir goyo tun sukanu.

⁸Nan di'e: Lali gilaŋatna van ka'a ki gukka nala, nan min pir goy gine'e hay fulda, kay gar liy ma musta. Gi-suk.

⁹Nan ma pir gosoyo, jaŋ gosoyo suw simeɗ ma donona, suw birina kaw.

¹⁰Bum-Sumuna, naŋ vatsi goyo, ɓurawsi vunsiya, kay mige nan ka wi waskayta hiɗi cirepta hay hoyok-ziyna.

¹¹Falayta hiɗi henjeta kaf nisi ka poya, kulo kay gulmunna, ŋuy hoyok-ziyna kaw, jiw-zlata hiɗi joota ka hayam kalafi.

¹²Ɓulakka ka hayamu, kulda hiɗi ɗutta may hin liyna valam noŋɗi.

¹³Kay sa ma ŋulanu kayni, may mi sa ma gawt kanɗi; la nala nan fi ziy kayni. Sa ma fok kulo kan kayni, may mi sa ma hunay hiɗi nanɗi; la nala nan fi ŋay tuwan kalamu.

¹⁴May li kayn mi naŋu, mi naŋ niranna, bananna hiɗi sugolanna,

¹⁵nay sa ay lakay ŋaa'a hiɗi vunay ŋiraya, nay ay tuɗ hay ziyna vi Lawn jar tokŋa kuɗ tuwaya.

¹⁶Hin mitta co kisiya, hinsi cuk gaa hay liyna vi mitta iriya, kay joota ka hay ziyna visiya, hay diksiya.

¹⁷Nanu, nan min siwel tam Lawna, Ma-Vatɗina ma suɗanu.

¹⁸Vulatita, grawta hiɗi falayta kaf, nan min tiya hiɗi siɗawta, nan min to sutiyanu kaw, kay nam min hum delanu.

¹⁹Nam suɗ ciwta vanu kay duura, vulan toyta kaw kay nisi sa dur hiɗi nanu ay ŋolo.

²⁰Lawna ma huma, ma hotsi yisi gaa'a kaw. Nam ma musi kay zlamda-mulda valamu hay ɓa-ɓa pa. Gi-suk. Kay nisi min mu'ɗi, li nar kuɗ Lawnɗi kaw.

²¹Nam meɗ ɓalam goyo kay nisi sa ay lakay hiɗi sle'ta hiɗi namu, nam muɗ bonota valamawa goy waa'a;

²²Vunamu ka golɓoto ki mul-miir nala, may varta vi dikamu kayni duura, yoboyna valamu ay golɓoto suw mula, may nir na'ta kep mi kew-gaferaŋa ma patay goyna.

²³Hin tuwaŋ hay ɓam Ma-Vatɗina, nam ma gutaŋu. Ta-ta hay vatɗita, nam ma hin sa ma ɗigera geɗ noŋɗi.

²⁴May naŋu Lawna, naŋ ma cuksi gaa hay zul ma wiŋŋa. Sum sa ɦok busuwn goyna hiɗi sum sa milena, nisi ma ɓiret buura visi gaa jaɗi; may nan hayɗini, nan vi man hayaŋu.