Read Masana NULLA 72 Bible Online

NULLA 72 - Masana bible

NULLA 72

¹Vi Salomon. Lawna, vul kitata vaŋu mi mulla, vul ɗigerta vaŋu mi goora vi mulla.

²Nam min ka kitata vi sumuna vaŋu hiɗi ɗigerta, ka kitat kay sa hawna vaŋu hiɗi ɗigere kaw.

³Hiɗiyna ma mar toyta tam sumuna, boŋoloŋŋa nala kaw, kuɗ ɗigerta vaŋu.

⁴Nam ma ka kitat hay hagata va'a kay sum sa hawna jar sumuna, nam ma suɗ gurona vi sa hawna goyo, sa curoɗ sumuna nam ma taysi gaa'a.

⁵Nisi ma li nar kuɗaŋu hay li ma fatta ka dok-dok, hay li ma tilla ka tuwa kaw, ta-ta tam jafsi voksi ɗaw.

⁶Nam ma jikay gaa'a ki niy ma si kay sine ma paray wuliya nala, ki niy ma butna ŋuruɓ nagata nala.

⁷Hay buura valam ɗawni sa ma ɗigera ma fi ŋaata, sle'ta ma li ŋolo kaw, ta-ta vat-goyta vi tilla.

⁸Nam ma ti mulu goy vun niy-lum ma ŋolla pa, ta-ta goy vun niy-lum ma ŋolla hena, goy vun niy-lumna pa ta-ta tam sin-nagat goŋ'.

⁹Nisi sa lak ziy hay fulda ma girifimu, sa gaw kalamna ma tilek butuwna.

¹⁰Muliyana vi Tarsis hiɗi muliyana vi jokota kaf ma vulum taara, muliyana vi Seba hiɗi Saba ma vulum slena.

¹¹Muliyana kaf ma girif gaa vokomu, jaf-sumuna pet ma sunumu.

¹²Kay nam suɗ sa ma hawna ma siwela, hiɗi sa ma hay sarta ma gutda valam tayɗi.

¹³Nam ma li slugot kay sa ma hawna, hiɗi sa ma va valam mayɗina, nam ma suɗ ciwta vi sa hawna.

¹⁴Nam ma butsi goyo kay curoɗa hiɗi ɦawlata, busuwna visi ma tek kiram ŋolo.

¹⁵Nisi ma lak iriya, nisi ma vulum or ma hay Saba; nisi ma siɗaw kalamu bay maka, nisi ma suburum hay buurta kafe.

¹⁶Wana ma li ŋolo hay nagata, kulo kay hiɗiyna, yalam ma ziwir ki gu ma hay Libaŋ nala; nisi sa hay hoyok-ziyna ma goɗa ki us ma hay nagat nala.

¹⁷Semda valamu ma li ta-ta hay vatɗita. Semda valamu ma tiy voka'a; sumun ma gi bol mi tuwsi hiɗi semda valamu, jaf-sumun kaf ma di sle'ta kalamu.

¹⁸Suburta tam Ma-Vatɗina Lawna, Lawna vi Israyel, nam kepe li sle ma ŋulo ŋulona.

¹⁹Suburta tam semda valamu ta gajijita ta-ta hay vatɗita vatɗita, nagata pet ma hoba hiɗi gajijita valamu. Amen! Amen!

²⁰Siɗawta vi David goora vi Isay vatawa.