Read Masana NULLA 74 Bible Online

NULLA 74 - Masana bible

NULLA 74

¹Nulla vi Asaf. Lawna, naŋ cukmaawa goyo ta-ta hay vatɗita kay mige? ɦiyda vaŋu pat no'oso kat fokŋa ma naŋ vulum tina kay mige?

²Humaŋ jak' kay sumuna vaŋu, Sa naŋ fisi hay ɓa-ɓa pa, Sa naŋ butsi goyo kay muɗsi goy jafna vi vocota vaŋu, hiɗiyta Siyon, liyn ma musta vaŋu.

³Tunaŋ seŋis kulo hay liyn ma ɓulakayna kayn tige, sle ma hay liyn ma peldetna sa ma gawta vurumumawa kafe.

⁴Sa gaw kaŋŋa ka ci gum kalaf hay Tempella vaŋu, Nisi tun ɗekka visi kulo'o kay li ɗekka.

⁵Nisi ɗuw ŋray ca ki san yaw ceɗna kulo kuɗ juru ma hebayna nala.

⁶Mus neeɗa kayni, sle ma ŋaana ma ceɗayna toy goy kisi kaf hiɗi ceɗna, hiɗi martona kaw.

⁷Liyn ma peldetna vaŋu nisi ŋalam goy hiɗi kuta, liyn ma semda vaŋ ka tuni hayna nisi muɗum goy waa'a, tom gaa kirɓicik' kaw.

⁸Nisi di hay diksi ala: Nay ma ɓulaksi kafe. Ziyna vi Lawna ma gaa kay nagata kaf nisi ŋalam goyo.

⁹Va ma li ɗekka goy kuma'na numa may wum loɗi, sa ma jobta may loɗi, sa jarma'a ma wi ala kayni ma li lancitige mayɗi.

¹⁰Lawna, sa ma gawta ma ŋula ta-ta lancitige? Sa ma gawta ma ɗuw semda vaŋu birek-ceke ta-ta hay vatɗit su?

¹¹Naŋ hot ɓaŋ ta jufta bugola'a kay mige? Meɗaŋ ɓaŋay goyo, vatsi goyo.

¹²Lawna nam mi mulla vanu hay ɓa-ɓa pa, nam kot su'da kay nagata.

¹³Naŋ ma ɓet niyn ŋolla hiɗi donota vaŋu, naŋ mun yam guy ŋulona ma hay niyna.

¹⁴Naŋ mun yam Leviyatan goyo,[25] naŋ vulum a ti'e mi sum sa hay fulda.

¹⁵Naŋ hin kaara lawa hiɗi niy-lokŋa mun kulo'o, may niy-lum ma ŋulona naŋ som goyo.

¹⁶Falayta kayni faŋŋa, henjeta kaw faŋŋa, naŋ kot haraŋa ma kulona, hiɗi fatta kaw.

¹⁷Vun dabaŋ-gu'ta vi nagata kaay kaŋ ka', menda hiɗi cayda naŋ kotomu.

¹⁸Humaŋ jak kay kayni, sa gawt kaŋŋa ŋul Ma-Vatɗinawa, jaf-sum sa ɦay-ɦayna kaw ɗuw semda vaŋawa birek-ceke.

¹⁹Vul ciwta vi gukka vaŋu tam sa ci matnaɗi, hin yaŋ jok sa hawna vaŋu ta-ta hay vatɗitɗi.

²⁰Ɗuwaŋ kay bonota, kay liyn ma jufunna vi nagata hobawa hiɗi ziyna vi sa coŋcoloŋŋa.

²¹Hin sa ma vun curoɗa hot goy zuloɗi. Hin sum sa hay sarta hiɗi sa hawna suburaŋ semda vaŋu.

²²Fokaŋ kulo'o, naŋ Lawna, ka kitata vaŋu, humaŋ jak kay sa ɦay-ɦayna sa ka ŋulaŋu hay buurta kafe.

²³Yaŋ ma jok luluta vi sa gaw kaŋŋaɗi, nisi sa yaw kulo kaŋu gijum-gijumta visi ka ɦur voka' dok-doko.