Read Masana NULLA 76 Bible Online

NULLA 76 - Masana bible

NULLA 76

¹Tam ma ŋolla vi sa gi nulla. Hiɗi dil ma zigewn kuɗumna. Nulla vi Asaf.

²Lawna sumun wumu hay Yuda, semda valam ŋolo hay Israyel.

³Nam li guɗukŋa valamu hay Salem, liyn ma musta valamu hay Siyon kaw.

⁴Ɗawni, nam kus ɓarawn goyo, kus kuroŋŋa goyo, kus kew-gaferaŋa goyo, hiɗi sle-ma-duura kaf. Gi-suk.

⁵Naŋ wile'e, naŋ dono'o, suw hiɗiyna vi sum sa coŋcoloŋŋa.

⁶Nisi vurumiya, sum jufay nisina sa hobay hiɗi kursulita. Nisi kali sene hay senda cawta visiya, nisi as a dur kay tuwsiɗi, sum jufay nisin sa donona.

⁷Kuɗ bayta vaŋ naŋ Lawna vi Yakub, kekena hiɗi sa ɓe kulumayna kaw cuk gaa hay senda.

⁸Naŋu narta kuɗaŋ ŋolo, hay li ma naŋ muɗawa ɦiya, sa ma as col digaŋ mi gige?

⁹Goy hay wuralawn pa delaŋ ma dina ka kitata vaŋawa, nagata li nari, tun kiliŋi kaw.

¹⁰Hay li ma Lawn fok kulo'o kay ka kitata, kay suɗ sa ziy-zlata kaf gaa kay nagata. Gi-suk.

¹¹Purcakka vi sum-wuran kaw vulaŋ suburta; naŋ ŋuyi hiɗi caw ɦiyda ma hinina.

¹²Yigi va kigi tam Ma-Vatɗina Lawna vigiya, hobom vunam kaw, hin nisi kaf sa ŋuyumna co hiɗi vulda tam nam ma narta ŋolo kuɗumna.

¹³Nam kus subur-tuwta vi muliyan gaa'a, nam joo'o ŋolo tam muliyan sa kay nagata.