Read Masana NULLA 77 Bible Online

NULLA 77 - Masana bible

NULLA 77

¹Tam ma ŋolla vi sa gi nulla. vi Yedutun. Nulla vi Asaf.

²Nan min siwel tam Lawna, nan min siwela, delan kal kulo'o tam Lawna, nam humanu may.

³Hay buur ma nan ka vun lasta, nan gar Bum-Sumuna; hay henjeta, ɓan kulo meɗiya, makɗi kaw; nan min teŋ-irta noŋɗi.

⁴Human gan kay Lawna, nan siɗawa kaw, nan min vara vara, sutiyan to'o. Gi-suk.

⁵Naŋ hinan iran duk gaa henjetɗi; nan hiwiri goyo, as di va noŋɗi.

⁶Nan vara kay buur ma ɓa-ɓana, kay busa ma kali jew din-dinna.

⁷Human gan kay nulla van ma kay henjetna, nan vara vara hay dikanu, ŋusta vanu ka jiɓera.

⁸Bum-Sumuna min gan goyo ta-ta hay vatɗita su? Nam min lan slugota loɗi su?

⁹Ŋaata valamu vatay vat kay dok-doko su? Yoboyna ma nam dum tayna muɗi waa'a kay dok-dok su?

¹⁰Lawna yalam jokawa kay li slugota su? Hay ɦiyda valamu, nam dukawa kay ŋaata valam su? Gi-suk.

¹¹Nan di'e: Lasta fan kayn kay mige ɓamta jufta vi ma Kulo-Jamna may hay liya'na loɗi.

¹²Nan min di goy kay lop ma ŋulona vi Ma-Vatɗina. Kay human min gan kay lopna ma ŋulona ma ɓa-ɓana.

¹³Nan min di goy kay lopna vaŋu kafe kaw, nan min vara kay lopna vaŋ ma ŋulona.

¹⁴Naŋ Lawna, hagata vaŋu peldete, lawn mara'a ma ŋol ki naŋ nala ka arige?

¹⁵Naŋu mi Lawn ma li sle ma ŋulo ŋulona; naŋ ɗek donotawa vaŋawa goy jar sumuna.

¹⁶Hiɗi gaŋeraŋa vaŋu naŋ but sumuna vaŋawa goyo, gurona vi Yakub hiɗi gurona vi Yosef. Gi-suk.

¹⁷Niy-lumna waŋawa, naŋ Lawna, hay li ma niy-lumna waŋu, nam li nari, zul ma wiŋŋa geɗa.

¹⁸Ɗugulla ɦok niyn goyo, del dukalawna tiy goyo, ɓarawta vaŋu ka jaŋ goy hay liyn kaf.

¹⁹Delaŋ ma bayna kal goy jar ɦiwliŋŋa, wileta fo nagat goy haraŋi, nagat geɗa wir kaw.

²⁰Naŋ gi hagata vaŋu jar niy-ŋolla, naŋ gi hagata gurayta vaŋu jar niy-lumna kaw, poyta vi seŋu sa fa' baŋala'ɗi.

²¹Naŋ tun vok sumuna vaŋu ki fok-dimina nala, hiɗi ɓam Musus hiɗi Aaron.