Read Masana NULLA 78 Bible Online

NULLA 78 - Masana bible

NULLA 78

¹Nulla vi Asaf. Sumuna vanu, humgi hatta vanu, muɗ humgi tam yoboyna vi vunanu.

²Nan min mal vunan goyo di law ma nir niramna, nan min di goy kay slen ma ŋayayna ma ɓa-ɓana.

³Va ma nay humawa waawa kaw, va ma sumiyaya dumawa taya.

⁴Va namna nay min ŋayam kay gurona visiɗi; nay min di goy kay suburta vi Ma-Vatɗina tam jafna ma min ma'a, nay min di goy kay donota valamu hiɗi gul-yalda ta nam li'e.

⁵Nam tun di-goyta valamu hay Yakub, nam tun gatta hay Israyel, nam vul hagata tam sumiyaya, kay hat kayni tam gurona visiya.

⁶kay jaf ma min ma'a, gurona sa bay vuɗ tuwana nisi fi wumu, fi fok kulo'o dum goyo tam gurona visiya,

⁷kay nisi fi cub Lawna hiɗi sle'ta, kay yisi ma jok lopna vi Lawnɗi, may vi kuɗ vun-ma-gatna valamu.

⁸Kay nisi ma li ki sumaysi naɗi, sumaysiya si sum sa yisi ɗeŋe, sum sa min humɗi kaw, sum sa diksi may coli ɗeŋɗi, sa diksi vi kuɗ Lawn gasiɗi.

⁹Gurona vi Efrayim sa ganay hiɗi ɓarawta hotay bugolo hay buur ma duura.

¹⁰Nisi vi kuɗ bonota vi Lawnɗi, min poy hay vun-ma-gatna valamɗi kaw.

¹¹Yisi jok lop ma ŋulona valamu hiɗi sle ma ŋulo-ŋulona valamu ma nam ɗekem kirsiya.

¹²Sle ma ŋulo ŋulona ma nam lum kirsiya hay nagata Egipte, hay fulda vi Sowan.

¹³Nam ɓet niy-lumna ma ŋolla goyo hinsi raw hayamu, nam hin niyna coli yam tuwam ki tokay kulo'o nala.

¹⁴Hay falayta nam ɗeksi kay hagata hiɗi ɗugulla, hay henjeta ta-ta co goy grawi hiɗi haraŋa vi kuta.

¹⁵Hiɗiy ma hay fulda nam munum goyo, nam vulsi niyna a ci'e ki goy hay zul niy ma ŋolla nala;

¹⁶Goy hay hiɗiyn pa nam hin niyn jaŋay goyo, nam hin niyn riŋ gaa'a ki hay niy-lumna nala.

¹⁷May hiɗi kayn kaf nisi tuɗ voksi tam sulukŋa, nisi yaw kulo kat ma Kulo-Jamna hay fulda karaŋga.

¹⁸Nisi wak Lawna hay diksiya, ta-ta nisi job tina kuɗ darta vi diksiya.

¹⁹Nisi law kat Lawna di'e: Lawna as kay vul tin mi sumuna goy hay fulda su?

²⁰Wulin kayni nam ci hiɗiyna, nala niyna munay goyo hiɗi dono'o, niy-lumna kaw hobawa; nam as vul funa lebo sliwna mi sumuna valam lo su?

²¹Kay na'ta hay li ma Ma-Vatɗina hum kayni, dikam roŋa, kuta doy kat Yakub, ɦiyda vi Ma-Vatɗina fok kulo'o kat sa Israyella.

²²Kay mige nisi min vi kuɗ Lawnɗi, kay nisi min zam ɓam su'da valamɗi kaw.

²³Nam vul hagata tam ɗugul ma kulona, nam mal vun-galana vi wuralawna goyo kaw;

²⁴nam hin manna si gaa kisiya kay ti'e, nam vulsi alkamare ma wuralawni pana.

²⁵Nisi kaf tum mi tina vi sa ŋulona, nisi kaf tin suwsi suwi goyo.

²⁶Nam hin simeɗ ma kuɗuwna biw hay dukalawna, hiɗi donota valamu nam mar simeɗ ma kayamina.

²⁷Nam hin sliwna si gaa kisiya ki butuwna nala, layay ma zlimitna ki ŋesl ma kel-niyna nala.

²⁸Nam hinim yak gaa'a hay guruna visiya, ŋuyi kat liyn ma musta visiya.

²⁹Nisi ti'e hobawa ŋol kaw, va ma nisi dara nam vulsiya.

³⁰Hay li ma haysi bay hob tuwa, hay li ma tin ka vunsi pasl tuwa,

³¹hay na'ta ɦiyda vi Lawna fok kulo kisiya, nam ci kuɗ sum sa ɗorayna visiya, joriyona vi Israyel nam cisi goyo kaw.

³²Hiɗi kayni kaf kaw nisi tuɗ vok hiɗi sulukŋa, nisi min vi kuɗ sle ma ŋulo ŋulona valamɗi.

³³Nam vat buura visi goy hay waata, busata visiya nam vata' goy hay narta-ŋolda kaw.

³⁴Hay li ma nam cisi goy mati, nisi garamu, nisi hotiya muɗ irsi kir Lawna.

³⁵Humsi gisi ala Lawna mi hiɗiyna visiya, ala Lawn ma Kulo-Jamna mi ma butsi goyna.

³⁶May nisi ɗutum hiɗi vunsiya, nisi ka sin talam ɦawa.

³⁷Diksi may tapay hiɗi nam donoɗi, nisi vi kuɗ bonota valamu gasiɗi kaw.

³⁸May namu mi slugona, nam vul gida kay jiw-zlata, nam ɓulak sanɗi kaw. Awa, sem ŋolo nam hin ɦiyda valamu hot bugolo, hin dikam roŋ kafɗi kaw.

³⁹Humam gum ala nisi ay mi sliw ɦawa, ki simeɗna ma kal goyo, hotɗi nala.

⁴⁰Nisi fokay kulo kalam hay fulda sem ŋolo tige. Nisi muɗum dikam yora hay liyn ma wiŋŋa tige.

⁴¹Nisi nem Lawna dok-doko, nisi ɓulak dik ma peldetna vi Israyel dok-doko.

⁴²Humsi min gisi kay donota valamɗi, hay buur ma nam butsi goy hay ɓam ma gawta.

⁴³Nanige nam li ɗekka hay Egipte, nanige nam li sle ma ŋulona hay fulda vi Sowan.

⁴⁴Nam muɗ niy-lumna visi goy busuwu, niy ma jaŋŋa visiya kaw ta-ta nisi fi a ciɗi.

⁴⁵Nam cuk raw-rawna ma vunam samna jarsiya kay tisiya, cuk luura jarsiya kay ɓulaksiya kaw.

⁴⁶Nam vul jaf-slena visiya mi baara, nam vul vuɗna vi lopna visiya mi bar-bobona kaw.

⁴⁷Nam vat gulda-guldana visi ma sinena goy hiɗi mogoyna, vat sikomora visi goy hiɗi sleɗna kaw.

⁴⁸Nam vul luwayna visiya goy tam mogoyna, fukunayna visiya tam kuta kaw.

⁴⁹Nam gi ɦiyda valam ta ŋolda kisiya, purcakka hiɗi guru'ta hiɗi lasta, vokŋa vi sa sunda vi joota.

⁵⁰Nam par hagat goyo kay ɦiyda valamu, nam ŋay ciwta visi kay mittaɗi, nam vul irita visi goy mi moy ma joona.

⁵¹Nam ci sa vuɗi jewna kaf hay Egipte, nam ci vun-jaf ma jewna vi donota gaa kuɗ guɗukŋa vi Kam.

⁵²May nam tun vok sumuna valamu ki vok fok-dimina nala, nam kalsi goy hay fulda ki fukunayn nala.

⁵³Nam ŋomsi ŋaa'a kay nisi ma li narɗi. May niy-ŋolla duk kay sa gawt-kisina.

⁵⁴Nam marsi hay jar-liyna valamu ma peldetna, kat hiɗiy na'ta ta nam fa' hiɗi ɓalam ta jufta.

⁵⁵Nam digiɗ jaf-sumun goy vok sa Israyella, nam ɓuraw nagat jarsi voco'o, nam hinsi lak hay guɗukŋa vi sum segena.

⁵⁶Nir na'ta kep nisi nem Lawna ma Kulo-Jamna, nisi ŋel vun-ma-gatna, min vi kuɗ yoboyna valamɗi kaw.

⁵⁷May nisi raw goyo, ŋel gatta ki sumaysi nala, nisi cal goyo ki ɓarawta ta ɗut sana nala.

⁵⁸Nisi muɗum ɦiya hiɗi liyna visi ma kulo ɗiŋiriŋŋa, nisi muɗum hunaya hiɗi lawayna visi ma waana.

⁵⁹Lawna hum kayni, nam muɗ ɦiya, nam zut sum sa Israyel goy hiɗi dono'o.

⁶⁰Nam noy liyn ma musta valamu hay Silo goyo, guɗukŋa ma nam pum jar sumuna;

⁶¹nam vul donota valamu goy hay daŋgayta, nam vul gajijita valamu hay ɓam sa gawta kaw.

⁶²Nam vul sumuna valamu goy tam kew-gaferaŋa, hayam roŋa kay vocota valamu kaw.

⁶³Kuta ŋal sum sa joriyona visiya, sumun fi gi nul ma dabayna kay guro-boyna visiɗi kaw.

⁶⁴Muliyan-sa-ɗifinna visiya puk gaa'a vok kew-gaferaŋa, boy sa duhulla visiya fi tiy noŋɗi kaw.

⁶⁵Hay na'ta Bum-Sumuna zliy kulo'o ki sa ma ay hay senda nala, ki sa ma gaŋeraŋa ma siwel kay dolayn nala.

⁶⁶Nam ci sa gawta sa muni vokom jaŋi, nam muɗsi goy zulo'o hiɗi zulota ta vatɗita.

⁶⁷Nam noy guɗukŋa vi Yosef goyo, nam vilek jafna vi Efrayimɗi kaw,

⁶⁸May nam vilek jafna vi Yuda, hiɗiyta Siyon ta nam mina'ta kaw.

⁶⁹Nam in liyn ma peldetna valamu ki liyn ma kulo ɗiŋiriŋi nala, ki nagata ta nam kota' kulo'o ta-ta hay vatɗita nala.

⁷⁰Nam vilek David sa ma sunda valamu, nam fum ay goy kuɗ ŋomda vi fok-dimin pa.

⁷¹Nam vumay goy kuɗ fok-dimina ma guron ka ci miir kuɗumna pa, maramu kay nam ma ŋom jafna vi Yakub, sumuna valam sa Israyella, vocota valamu kaw.

⁷²Nala nam ŋomsiya kuɗ gasita vi dikamu, nam digersiya hiɗi ɓalam ma yalla.