Read Masana NULLA 79 Bible Online

NULLA 79 - Masana bible

NULLA 79

¹Nulla vi Asaf. Lawna, jaf-sumuna sli vocota vaŋawa, nisi muɗ Tempella vaŋ ma peldetnawa liwisi, nisi ɦo Yerusalemawa gaa'a, muɗa'awa goy yam-jono'o.

²Nisi vul tuwna vi sa sunda vaŋawa goy mi layayn ma dukalawna a ti'e, nisi vul sliw sa peldetna vaŋawa mi muuriyan ma kay nagatna;

³nisi ɦoksi busuwsi goyo ki niyn nala goy gal Yerusalem, sa ma pisi gaa'a may noŋɗi.

⁴Numa muɗi goy zulo'o vok sugolayma'na, muɗi goy ŋulda hiɗi burahta vun nisi sa ziy hiɗi numana.

⁵Ta-ta lancitige Ma-Vatɗina? Naŋ min mus hay ɦiyda ta-ta hay vatɗit su? ɦiyda vaŋ min ŋal ki kuta nala ta-ta lancitige?

⁶ɦokaŋ purcakka vaŋu goy kay jaf-sum sa bay waŋu, kay mulda ta yi semda vaŋɗita kaw.

⁷Kay nisi lig jafna vi Yakubawa, ɓulak ziyna valamawa goy waa'a kaw.

⁸Ŋa jiw-zlata vi sumayma kumaɗi, hin slugota vaŋu co tuma gosoyo, kay numa muɗi haw ŋolo.

⁹Lawna ma su'da vuma'a, gutaŋ kuɗma'a gutge, kay gajijita vi semda vaŋu, butma goyo, cukma sulukŋa vuma'a cukge kay semda vaŋu.

¹⁰A jaf-sumun ma di ala Lawna visi ka arige kayn kay mige? Hin jaf-sumuna wi job-yamda vi busuwna vi sumuna vaŋu vok irma'a. Jobaŋ yam busuwna vi sa sunda vaŋu, busuw ma ɦoki goyna.

¹¹Hin tiyta vi sa daŋgayna co ta-ta taŋu, hiɗi ɓaŋ ma donona, suɗaŋ sumuna vaŋ goy vun mitta.

¹²Bum-Sumuna, wurakaŋ sum sa ziysi hiɗi numana sem siɗiya, kay ŋulda ta nisi ŋulaŋu.

¹³Numa'a, sumuna vaŋu, fukunayna ma naŋ vulum tina, numa'a min gaŋ deɓe ta-ta hay vatɗita, numa'a min di goy kay ŋolda vaŋu tam jafna vokma'a vokma'a.