Read Masana NULLA 80 Bible Online

NULLA 80 - Masana bible

NULLA 80

¹Tam ma ŋolla vi sa gi nulla. Di-goyta. Nulla vi Asaf.

²Naŋ ma ŋomda vi Israyel, jak humaŋ tanu, naŋu mi ma ŋom Yosef ki fukunayna nala, naŋu ma musi kulo'o jar kerubena*, vul tuwaŋ goyo hay gajijita.

³Zliy gaŋeraŋa vaŋ kulo'o vok Efrayim hiɗi Benyamin hiɗi Manase, naŋaya kay suɗma'a.

⁴Lawna, hotma'ay taŋu, hin vokaŋ li haraŋi, kay numa ma fi su'da.

⁵Ma-Vatɗina Lawna vi vok-ma-duura, naŋ min mus ɦiy tam siɗawta vi sumuna vaŋ nala ta-ta lancitige?

⁶Naŋ vulsi zimiyna ki tina visi nala, naŋ hobsiyawa sem ɦidi hiɗi zimiyna kaw.

⁷Naŋ muɗma mi va ma sum sa galma'na ci way jar-tuwsi kuɗma'a, sa gaw kuma'na cen kuɗma'a.

⁸Lawna vi vok-ma-duura, naŋ hot yawma kulo'o, hin vokaŋ wile'e, nala numa ma fi su'da.

⁹Naŋ mar gu gulda-guldana ay goy hay Egipte pa, naŋ digiɗ jaf-sumun goyo, naŋ pum gaa'a.

¹⁰Naŋ kot liyna goy kalamu, nam biya so'olom goyo, nam hob nagatawa;

¹¹hiɗiyna kusuɓi hiɗi ɗuŋusamu, ɓalamu ki ɓam gu-gamna vi Lawna nala.

¹²Nam ɓet ɓalam goyo ta-ta tam niy-lum ma ŋolla, sutiyam ta-ta tam niy ma ŋolla kaw.

¹³Naŋ ɦo gulmunna valam gaa'a kaw, ta-ta a nisi sa hay hagata yaw kuɗum kaw kay mige?

¹⁴Zeŋŋa ma fulu mutum hiɗi siyamu, muuriyan ma hay sinena ti kuɗumu kaw.

¹⁵Lawna vi vok-ma-duura, hotaŋiya, kulo hay wuralawni pa, ɗuwaŋay gaa'a. gutaŋ kuɗ gulda-gulda namna.

¹⁶ŋom va ma naŋ pi hiɗi ɓaŋ ma jufna, hiɗi goora ma naŋ vilekemawa.

¹⁷Nam ŋalay kay kuta, nam kaay gaa'a, nisi ba goyo vok ɦiyda vaŋu.

¹⁸Hin ɓan tuni kulo'o kay sana vaŋ ma hay galaŋ ma jufna, kay goora vi sana ma naŋ vilekemawa.

¹⁹Nala numa min hinaŋɗi, hinma lak iriya, nala numa ma yi semda vaŋu.

²⁰Ma-Vatɗina, Lawna vi vok-ma-duura, Hinma hotay taŋu lo, hin vokaŋu li haraŋi, kay numa'a ma fi su'da.