Read Masana NULLA 84 Bible Online

NULLA 84 - Masana bible

NULLA 84

¹Tam ma ŋolla vi sa gi nulla. Nulla vi gurona vi Kore.

²Ma-Vatɗina Lawna vi vok-ma-duura, liyn ma musta vaŋu ka jifiy ŋolo natige.

³Ciwta van ka tiya, nan ŋokiya kaw, kay hayan ma ka tiy kay wur-daŋŋa vi Ma-Vatɗina. Tuwan noŋ kaf ka siwel hiɗi firita tam Lawn ma irina.

⁴Colgona kaw ziyna valam ka'a, lay-ŋusna tokosayna valam ka kaw, kay cuk gurona valam haya. Giwin-ma-ɗifinna vaŋu, Ma-Vatɗina vok-ma-duura, mulla vanu hiɗi Lawna vanu.

⁵Sle'ta ka kay nisi sa lak hay ziyna vaŋu, nisi ma tiyaŋ seŋ lo lo. Gi-suk.

⁶Sle'ta ka kay sum sa deŋ tuwsi taŋu, nisi fi hay diksiya hagata ta paray goy jewe.

⁷La nisi poy hay lokŋa vi tiyna[30] nisi ma muɗum goy liyna vi kaar ma law niyna, Awa, law ma si jewna ma ŋuruɓ yam liyna hiɗi bolda.

⁸Nisi tuɗ voksiya hiɗi donot suwa suwa, nisi ma col vok Lawna hay Siyon.

⁹Ma-Vatɗina, Lawna vi vok-ma-duura, humaŋ siɗawta vanu, jakaŋ humaŋu, Lawna vi Yakub, Gi-suk.

¹⁰Lawna kuroŋŋa vuma'a, ɗuwaŋu, ɗuw ira vi faŋŋa ma mul ɦoki kamna.

¹¹Kay fatta kepta hay wur-daŋŋa vaŋ kayni na' ŋaa'a suw buur ma birimi goy hay liyn mara'a. Nan vilekawa kay col hay vun-galana vi Lawna vanu, kayni ŋaa'a suw kay musta hay guɗukŋa vi sa jiw-zlata.

¹²Kay Ma-Vatɗina Lawna nam mi fatta, mi kuroŋŋa kaw, Ma-Vatɗina vul slugota hiɗi gajijita, Tam nisi sa poy ɗigere, nam may noy va ma ŋaa'a goy kisi noŋɗi.

¹³Ma-Vatɗina vi vok-ma-duura, sle'ta ka kay sa ma zamaŋ ɓaŋu.