Read Masana NULLA 86 Bible Online

NULLA 86 - Masana bible

NULLA 86

¹Siɗawta vi David. Ma-Vatɗina, jak humaŋu, hum siɗawta vanu, kay nanu maŋaya, hawi kaw.

²Ŋomaŋ ciwta vanu, kay nan vi kuɗaŋu. Lawna vanu, suɗ sa ma sunda vaŋu ma vi hayaŋu.

³Lan slugota Bum-Sumuna, kay nan busa he' siwel taŋu.

⁴Hin ciwta vi sunda vaŋu li firiya, Bum-Sumuna, kay taŋ naŋu nan sli ciwta van kulo'o.

⁵Kay naŋu Bum-Sumuna, mi ŋaa'a, naŋ min cuk sulukŋa kaw, hayaŋ tiy ŋolo kay nisi kaf sa yaŋu.

⁶Ma-Vatɗina, jak humaŋ tam siɗawta vanu, humaŋ del siɗawta van humge.

⁷Hay buura ma lasta ka kanu nan min yaŋu, kay naŋ min hum siɗawta vanu.

⁸Jar lawayn kaf kep kaw ma ŋray hiɗi naŋ mayɗi, Bum-Sumuna, va ma ŋray hiɗi lopna vaŋu mayɗi kaw.

⁹Jaf-sumun kaf sa naŋ kotsina ma co'o, kay girif gaa vokaŋu, Ma-Vatɗina, nisi ma vul suburta tam semda vaŋu.

¹⁰Kay naŋu mi ma ŋolla, naŋ li sle ma ŋulo ŋulona kaw; naŋ kepe mi Lawna.

¹¹Ma-Vatɗina hatan hagata vaŋu, nan min poy hay gasita vaŋu. Kotan dikan kepe kay li nar kuɗ semda vaŋu.

¹²Bum-Sumuna Lawna vanu, nan min suburaŋu hiɗi dikan kaf, nan min vul gajijita mi semda vaŋu, ta-ta hay vatɗita.

¹³Kay ŋaata vaŋu ka ŋolo tanu, naŋ but ciwta vanawa goy hay liyna vi mitta.

¹⁴Lawna, sa jigal tuwsina yaway kulo'o katanu, vokŋa vi sum sa coŋ-coloŋŋa gar irita vanu, nisi may var kaŋ noŋɗi.

¹⁵May naŋu Bum-Sumuna, Naŋ mi Lawna ma hayaŋ tiy kay sumuna, Lawna ma slugona ma muɗ ɦiy gosoyɗi, ma hobawa ŋolo hiɗi slugota hiɗi gasita.

¹⁶Muɗaŋ iraŋ tanu, lan slugota, vul donota mi sa ma sunda vaŋu, suɗaŋ goora vi cata-sunda vaŋ goyo.

¹⁷Laŋ ɗekka ŋaata kanu, kay nisi sa ka gawt kanu fi wi kayni, muɗ zulo'o kaw, kay naŋ Ma-Vatɗina gutawa kuɗanu, teŋan iranawa kaw.