Read Masana NULLA 89 Bible Online

NULLA 89 - Masana bible

NULLA 89

²Nan min gi nul kay lop ma ŋaana vi Ma-Vatɗina, ta-ta hay vatɗita, nan min di goy hiɗi vunanu kay gasita valamu, tam jafn lo jafn lo.

³Kay nan di'e: ŋaata se' ini gaa'a ta-ta hay vatɗita, gasita vaŋu naŋ kota' kulo'o hay wuralawna.

⁴Nan jun bonota hiɗi ma vileki-goyna vanu, nan yi va kanu tam sunda vanu David.

⁵Nan min kot jafna vaŋ dono'o ta-ta hay vatɗita, nan min in zlamda-mulda vaŋu tam jafna lo jafna lo. Gi-suk.

⁶Ma-Vatɗina, dukalawna ma subur lop ma ŋulona vaŋu, nam ma subur gasita vaŋu kaw, hay tapna vi sa peldetna vaŋu.

⁷Kay hay wuralawna, sa ma ŋray hiɗi Ma-Vatɗina mi gige? Jar gurona vi Lawna sa ma ŋray hiɗi naŋu mi gige?

⁸Lawna narta kuɗum ŋolo hay tokŋa vi sa peldetna, nisi sa ŋuyumna ma li nar kuɗum ŋolo.

⁹Ma-Vatɗina, Lawna vi vok-ma-duura, ma gaŋeraŋ ki naŋ Ma-Vatɗin nala mi gige? Gasita vaŋu ka ŋuyaŋu kaw.

¹⁰Naŋ kol kay jigal-tuwta vi niyn-ŋolla, hay li ma billa valam fok kulo'o, naŋ tunum gaa'a.

¹¹Naŋu mi ma tay Egipte gaa kuɗ seŋu ki sa ma mitina nala, naŋ mer sa gawt kaŋŋa goyawa hiɗi bigiyaŋ ma donona.

¹²Dukalawna hiɗi nagata kaf mi faŋŋa, naŋu mi ma in nagata hiɗi sle ma haya' kafna.

¹³Naŋu mi ma in gal ma gaana hiɗi gal ma kayamna, Tabor hiɗi Hermon li firiya kay semda vaŋu.

¹⁴Bigiyaŋ dono'o, ɓaŋ dono'o, ɓaŋ ta jufta ka meɗay kulo'o.

¹⁵Ɗigerta hiɗi kitata ɗigerta kayni mi va ma sem zlamda-mulda vaŋ tuni kalamu, slugota hiɗi gasita ka vok iraŋu.

¹⁶Sle'ta ka kay sum sa wi siwelda-firita, nisi ma poy hay haraŋa vi vokaŋu.

¹⁷Nisi ma mak kay firitɗi kuɗ semda vaŋu, nisi ma subur tuwsi kuɗ semda vaŋu.

¹⁸Kay naŋu mi gajijita vi donota visiya, kuɗ ŋaata vaŋu naŋ ma sli miyokŋa vuma kulo'o.

¹⁹Kay Ma-Vatɗina nam mi kuroŋŋa, ma peldetna vi Israyel nam mi mulla vuma'a kaw.

²⁰Naŋ law kat ma hayaŋ kalamna hiɗi slen ma vul tuwam kir sana, naŋ di'e: Nan guti kuɗ sa ma donona, nan vul goor ma joriyo jar sumuna;

²¹Nan fi David ma sunda vanawa, nan ɦok mul ma peldetna vanawa kalamu.

²²Ɓanu ma gutum dok-doko, bigiyanu ma vulum dono'o.

²³Sa gawta ma co kalam tugumɗi, sum sa joona ma curoɗomɗi kaw.

²⁴Sa gaw kalamna nan ma kirapsi gaa vok iramu, nisi sa gaw kalamu nan ma cisi goyo kaw.

²⁵May gasita vanu hiɗi ŋaata vanu ma mus hiɗi namu, donota valamu ma wul kulo'o kuɗ semda vanu.

²⁶Nan min tun ɓalamu kay niy-lum ma ŋolla, tunum ɓalam ta jufta kay niy-lumna kaw.

²⁷Nam ma yi semda vanu ala: Naŋu mi bunu, naŋu mi Lawna vanu hiɗi hiɗiy ma su'da vanu.

²⁸Nanu, nan min muɗum ma vuɗi jewna vanu, ma ŋolla vi muliyana gaa kay nagata.

²⁹Nan min ŋay ŋaata vanu kulo talamu ta-ta hay vatɗita, bonota vanu hiɗi namu ma col dono'o.

³⁰Nan min hin jafna valamu mus ta-ta hay vatɗita, zlamda-mulda valamu ki buura vi dukalawna nala.

³¹La gurona valamu hin vun-ma-gatna van goyo, min poy kuɗ ɗota-gatta vanɗi,

³²la nisi wi dita vanu, may li kuɗ vun-ma-gatna vanɗi,

³³hay na'ta nan min gatsi hiɗi zugulla kay sulukŋa visiya, gatsi hiɗi bakmarana kay jiw-zlata visiya;

³⁴may ŋaata vanu nan min yawa' goy kalamɗi, gasita vanu nan ma puw vunan ka'ɗi kaw.

³⁵Nan ma raw bonota van goyɗi, va ma kali goy hay vunan pa nan ma muɗumɗi.

³⁶Nan yi va kanu sem kepe hiɗi peldetta vanu, nan as ka sin tam David su?

³⁷Jafna valamu ma mus ta-ta hay vatɗita, zlamda-mulda valamu ma col vok iranu ki fatta nala.

³⁸Nan ma col dono'o ta-ta hay vatɗita ki mislekŋa nala. Ma di-goyna ma hay wuralawna nam gasiya. Gi-suk.

³⁹May naŋ gumawa goyo lo, noyomawa goyo, dikaŋ ɓulakawa tam faŋŋa ma mul ɦoki kamna.

⁴⁰Bonota ta jaraŋ hiɗi ma sunda vaŋu naŋ ɗuwa'awa birek-ceke, bogoray ta mulda valamu naŋ ga'awa gaa'a, muɗa'awa liwisi.

⁴¹Naŋ ɦo gulmunna valamawa kaf gaa'a, ziyn ma donona valamu naŋ muɗumawa goy yam-jono'o.

⁴²Nisi kaf sa raw hay hagata vurumumu, nam muɗi goy va ma zulo'o kir sum sa galamna.

⁴³Naŋ vi ɓamta-jufta vi sa gaw kalamna kulo'o, naŋ hin sa gaw kalamna kaf li firiya.

⁴⁴Naŋ hin kew-gaferaŋa valam ma siy ŋolo hot bugolo, naŋ gut kuɗumu kay nam ma col vun duuraɗi.

⁴⁵Naŋ vat gajijita valamawa goyo, zlamda-mulda valamu naŋ ga'awa goy gaa hay butuwna.

⁴⁶Buurta vi joriyota valamu naŋ ka' kiɗaya, naŋ ŋuyumawa hiɗi zulota. Gi-suk.

⁴⁷Ma-Vatɗina, naŋ ma ŋay tuwaŋ dok-doko ta-ta lancitige? ɦiyda vaŋu ma ŋal ki kuta nala kaw ta-ta lancitige?

⁴⁸Hin humaŋ gaŋ kay giɗeŋga vi irita vanu, gurona vi sumuna naŋ lisi kayn kay waa'a ɦawa.

⁴⁹Sa mara ma fi mus iriya ta-ta wi mittaɗi mi gige? Sa ma fi suɗ ciwta valamu goy vun liyna vi mitta mi gige? Gi-suk.

⁵⁰Bum-Sumuna, lop ma ŋaana vaŋ ma jewna ma naŋ yi va kaŋ tam David hay gasita vaŋu ka arige?

⁵¹Bum-Sumuna, humaŋ ma gaŋ kay zulota vi sa sunda vaŋu, humaŋ ma gaŋ ala nan ka ziy sumun ŋolo kalaf hayanu;

⁵²Humaŋ ma gaŋ kay ŋulda vi sa gaw kaŋŋa, Ma-Vatɗina, ŋulda ta nisi ka ŋul faŋŋa ma mul ɦoki kalamna.

⁵³Gi deɓ mi Ma-Vatɗina ta-ta hay vatɗita. Amen! Amen!