Read Masana NULLA 91 Bible Online

NULLA 91 - Masana bible

NULLA 91

¹Sa ma mus hay liyna ma ŋayna vi ma ŋol ma kulona, nam ma musa kuɗ ɗuŋus ma Gaŋeraŋ-Petna.

²Nan di tam Ma-Vatɗina, liyn ma ŋayna vanu hiɗi gulmunna vanu, Lawna vanu ma nan viy hayamna.

³Kay nam suɗan goy kay jawta vi sa ma vi layayna, goy kay moy ma joona ma ci sumuna.

⁴Nam min koɗ gilaŋatam kaŋu, naŋ ma fi liyn ma ŋayna gaa kuɗ gilaŋatamu. Gasita valamu mi kuroŋŋa hiɗi marayta kaw.

⁵Naŋ ma li nari kay joota ta henjetaɗi, kay ɓarawta ta gi falaytaɗi kaw.

⁶Kay moy ma joona ma tuɗ hay jufundaɗi, kay moy ma jok kuɗ sumuna ma ci san falay-calakŋaɗi kaw.

⁷La sumun birimi cuk gaa galaŋu, la sumun birim doogo cuk gaa galaŋ ma jufna kaw, va as co taŋ naŋɗi.

⁸Hiɗi iraŋ ɦawa naŋ ma ɗuwa, naŋ ma wi wurakŋa vi sa jiw-zlata.

⁹Kay naŋu Ma-Vatɗina mi liyn ma ŋayna vanu, ma Kulo-Jamna mi liyn ma ŋayna vaŋu.

¹⁰Va ma joo'o as faŋ noŋɗi, bakmarana kep kaw ma co goboy tam guɗukŋa vaŋɗi.

¹¹Kay nam ma di sa sunda-wuralawna valamu kaŋu kay ŋomaŋ hay hagata vaŋ kafe.

¹²Nisi ma ziyaŋ kulo'o hay ɓisiya, kay hiɗiyn ma dabaŋ seŋɗi.[31]

¹³Naŋ ma poy kulo kay zlona hiɗi guy ma joona, zlo-joriyona hiɗi guyna naŋ ma tayam gaa'a.

¹⁴Kay nam tun minda valamu kanu, nala nan min suɗum goyo, nan min naram hay liyn ma ŋayna, kay nam wi semda vanu.

¹⁵Nam ma yi semda van hay vunamu, nan ma hotom dita, kay nan min mus hiɗi namu hay lasta valamu, nan min suɗum goyo, vulum gajijita kaw.

¹⁶Nan min hobom hiɗi buur ma fiyokŋa, nan min hinim ɗuw su'da vanu kaw.