Read Masana NULLA 97 Bible Online

NULLA 97 - Masana bible

NULLA 97

¹Ma-Vatɗina ti mulda. Hin nagat kaf mus hay firita, hin hiɗiy ma dak-dakŋa li firiya.

²Ɗugulla hiɗi jufunda ka ŋuyumu. Ɗigerta hiɗi kitata ɗigerta kayni mi va ma sem zlamda-mulda valamu tuni kalamu.

³Kuta ka tuɗ vokomu, na' ŋal sa gawt kalamna sa ŋuyi galamna.

⁴Wileta valamu li haraŋi kay nagata, nagata wumu, na' wira kaw.

⁵Hiɗiyna yor goyo ki diyakŋa nala vok ir Ma-Vatɗina, Vok ir Bum-Sumuna vi nagat kuɗulu.

⁶Dukalawna li di-goyta kay ɗigerta valamu, sumun kaf wi gajijita valamu.

⁷Nisi kaf sa girif sle ma sli tuw sana ma muɗ zulo'o, sa subur lawayn waana kaw. Lawayn kaf girifimti mi namu.

⁸Siyon hum kayni, na' li firiya, guro-boyna vi Yuda ka hay firita ŋolda, kuɗ kitata vaŋu, naŋ Lawna.

⁹Kay naŋu Ma-Vatɗina, naŋu mi ma kulo gine'e kay nagat kafe, ŋolda vaŋ ta ŋolda kulo suw kay lawayn kafe.

¹⁰Nigi sa min Ma-Vatɗina, kaagi gawt tam joota. Nam ŋom ciwta vi sa peldetna valamu, nam suɗsi goy hay ɓam sa jiw-zlata.

¹¹Haraŋa wasawa kay sa ma ɗigera, firita kaw kay sa ɗigerta hay diksiya.

¹²Firigiya hay Ma-Vatɗina, nigi sa ɗigera, suburgi semda valamu ta peldetta.