Read Masana LAW MA NIR-NIRAMNA 1 Bible Online

LAW MA NIR-NIRAMNA 1 - Masana bible

LAW MA NIR-NIRAMNA 1

¹Law ma nir-niramna vi Salomon, goora vi David, mulla vi Israyel.

²Kay wi yalda hiɗi hatta, kay hum yoboyna vi yamda-wida;

³kay fi hatta vi varta ŋaata vi gasita, vi kitata ta hay liya'ta hiɗi ɗigerta;

⁴kay vul yalda mi sa bay yalla; kay vul wida hiɗi varta mi sa joriyona.

⁵Hin sa ma yalla huma, nala nam ma jor wida valamu, sa ma ka hiɗi yamda-wida ma jor wida valam vok suwa,

⁶kay hum caw law ma nir niramna hiɗi vanbona, kay hum yoboyna vi sa yalla hiɗi law ma guɗulina.

⁷Narta kuɗ Ma-Vatɗina kayni tun cawta vi yalla; sum sa ɦay-ɦayna ɗuw yalla hiɗi ɗek-yalda birek-ceke.

⁸Goora vanu, humaŋ sle ma buŋ ka hataŋgina, hatta ta suŋ hataŋu naŋ ma ga' goyɗi.

⁹kay kayni mi bogorayna vi slugota ma tuni kaŋŋa, mi komona ma giy delaŋu.

¹⁰Goora vanu, la sum sa sulukŋa min ɗutaŋu, naŋ ma tap kuɗsiɗi,

¹¹La nisi di ala naŋay hiɗi numa'a, ganay jawt vok sumuna, ɦokay busuwn goyo, ganay jawta vok sa ma bay li joota,

¹²nay ma pisi gaa iri kafe, ki liyna vi sa mitin nala, nay muɗsi kaf ki sum sa jik gaa hay zulla nala,

¹³nay ma fi sle ma ŋaana kuɗ jafam kaf, nay ma hob ziyna vay hiɗi sle ma nay tum ɓuraŋŋa;

¹⁴galla vaŋu ka jarma'a, slena vay nay ma tapam hay birim kepe!

¹⁵Goora vanu, naŋ ma tun goy hay hagat hiɗi nisiɗi, vaŋ tuwaŋ goy hay hagata visiya;

¹⁶kay sesiya ka jaŋ kat joota, nisi li koloyo kay ɦok busuw goyo.

¹⁷La naŋ gan jawta vok lay ma zlimitna hay li ma iram ka cuki ka'a, kayn naŋ mak tuwaŋ ɦawa.

¹⁸May nisiya, nisi gan jawta kayni vok busuwna visi kay tuwsiya, nisi gan jawta kayni vok ciwta visi kay tuwa'a.

¹⁹Nisi sa diksi gar kay fi slena, van co kisi ki kayn nala, sum sa vul tuwsi goy hay haramna, haramna basi goyo.

²⁰Yalda ka siwel goy hay hagata, na' ka siwel kulo ŋolo hay liyn ma lakka,

²¹na' ka ciriya hay liyn ma winek ka hayam ŋolo, hay vun-galana vi hoyok-ziyna, na' ka di dela'a,

²²nigi sa bay-yalla, nigi min bay-yalda nala ta-ta lancitige? Sum sa burahta diksi ma min burahta ki kayn nala ta-ta lancitige? Nigi sa ɦay-ɦayna, nigi ma ka gaw hiɗi yalda nala ta-ta lancitige?

²³Muɗgi irgi aya kay hum bayta vanu, Humgiya, nan ma yam ŋusta van goy kigiya, nan ma ɗekgi kay yoboyna vanu.

²⁴Kay nan ka yi'e, may nigi humanɗi, kay nan meɗ ɓan goyo, may sa min tun humamɗi,

²⁵Kay nigi noy gatta van goy kafe, kay nigi min hum bayta vanɗi,

²⁶Nala nan kaw, nan ma cena hay li ma nigi ma kal vun zlata, nan ma pangiya hay li ma ɦuyumda nigawa gaa'a kigiya.

²⁷Hay li ma narta-ŋolda nigawa gaa kigiya ki simeɗ ma biwna nala, hay li ma lasta ma ŋuygiya ki ɦiwliŋŋa nala, hay li ma lasta hiɗi sum-zlata ma nig kigiya.

²⁸Hay na'ta nisi ma yanu, may nan ma hotsi ditɗi, nisi ma garanu, may nisi ma fanɗi.

²⁹Kay nisi ka gawi hiɗi wida, nisi may vilek narta ta kuɗ Ma-Vatɗinaɗi,

³⁰kay nisi min hum gatta vanɗi, bayta vanu kaf nisi sara' birek-ceke.

³¹Nala nisi ma ti vuɗna vi lopna visiya, nisi ma hob haysiya hiɗi gatta visi kay tuwsiya,

³²kay sum sa bay-yalla ŋel-gatta visi cisi goyo, Bay-varta vi sum sa ɦay-ɦayna kaw vatsi goyo.

³³May nam ma hum kuɗanu ma fi sle'ta hay ziyna valamu, nam ma mus ŋal kiliŋ bay li nar kay joo tara kep noŋo.