Read Masana LAW MA NIR-NIRAMNA 10 Bible Online

LAW MA NIR-NIRAMNA 10 - Masana bible

LAW MA NIR-NIRAMNA 10

¹Law ma nir-niramna vi Salomon. Goor ma yalla firi dik bulumu, goor ma ɦay-ɦayna vul yorta mi sulumu.

²Faray ma fum hiɗi joota may biyaɗi, may ɗigerta but san goy vun mitta.

³Ma-Vatɗina may hin sa ma ɗigera ci las kay maytɗi, may nam zut goslta vi sum sa joon goyo.

⁴Sa ma sileɗ ɓalam gaa kuɗumna muɗ hawi, may sa ma ɓalam koloyna muɗ faraya.

⁵Sa ma tok slen kulo'o hay cayda mi goor ma yali, sa ma kal sene hay liyna vi feɗna mi goor ma mar zulota.

⁶Bolda ka kay sa ma ɗigera, may waskayta ka ŋayay hay vun sum sa joona.

⁷Gi humda kay sa ma ɗigera bolda kuɗa'a, may semda vi sa ma joona ɦasis goyo.

⁸Sa ma dikam yali hum gatta, may sa ma vunam di sle ma ɦay-ɦayna jaŋ tam ba-goyta valamu.

⁹Sa ma poy hay gasita poy hay sle'ta, may sa ma sli hagata ta gunita ŋomda valam mayɗi.

¹⁰Sa ma li iram mirikŋa mar yorta, sa ma vunam di sle ma ɦay-ɦayna jaŋ tam ba-goyta valamu.

¹¹Dita vi sa ma ɗigera vul irita, may waskayta ka ŋayay hay vun sum sa joona.

¹²Gawta mar cirepta, may minda bar joot kaf.[2]

¹³Sa ma ka hiɗi yam ta wida, yalda ka hay vunamu, may sa ma ɦay-ɦayna libetna may hinimɗi.

¹⁴Sum sa yalla ŋom wida, may sum sa ɦay-ɦayna vunsi mar ɓulakka kisi koloyo.

¹⁵Farayna vi sa ma mayanda ŋray hiɗi hoyok-ziy ma gulmun talamna; ɓulak-goyta vi sum sa maŋayna kayni mi hawta visiya.

¹⁶Lopna vi sa ma ɗigera naram tam irita, wurakŋa vi sa ma joona naram tam sulukŋa.

¹⁷Sa ma human gum kay gatta sli hagata vi irita, may sa ma yalam jok kay bayta viy tuwam goyo.

¹⁸Sa ma ŋay gawta hay dikamna mi sa ma sinda hay vunamu, sa ma mer lawta goy kay sana mi sa ma ɦay-ɦayna.

¹⁹Sa ma law ŋolo lop bay li sulukɗi, may sa ma ŋom sinamu nam mi sa ma yali.

²⁰Dita vi sa ma ɗigera ŋray ca hiɗi doorota ta vilekayta; dikga vi sa ma joona may as va noŋɗi.

²¹Dita vi sum sa ɗigera ɗiger sumun ŋolo, sum sa ɦay-ɦayna mita kuɗ bay-gasita visiya.

²²Li san faray kayni ti bolda vi Ma-Vatɗina, makka ta san vul mi tuwamu cuk va vun kayn noŋ ne'ɗi.

²³Kir sa ma ɦay-ɦayna ci-matta ki va ma liw ɦawa nala, may yalda na' vi sa yalam wi'e.

²⁴Va ma sum sa joon li nar kalamna co kisi mi namu; va ma sum sa ɗigera minimna co kisi mi namu.

²⁵Sum sa joona mit goyo ki ɦiwliŋŋa jik nala, may sa ma ɗigera selem ma piy gaana may ge'ɗi.

²⁶Sa ma zulomda nam kat sa ma gum sunna ŋray ca ki cinna kat siyta nala, ki no'osna kat ira nala.

²⁷Narta kuɗ Ma-Vatɗina ɦur buura vi san voko, may busata vi sa ma joona na' kaay kiɗaya.

²⁸Cubta vi sa ma ɗigera ti firita, may cubta-sle'ta vi sa ma joona ma ba goyo.

²⁹Hagata vi Ma-Vatɗina mi dolla kay dikga-ɗigerta, may na'a ti ba-goyta kay nisi sa li joota.

³⁰Sum sa ɗigera ma geɗ noŋɗi, may sum sa joona ma li ziy hay nagatɗi.

³¹Vun sa ma ɗigera vuɗ yalla, may sin ma bay-ɗigera ma kaays goyo.

³²Sa ma ɗigera vunam ɗek yoboy ma slugona, may sa ma joona vunam ɗek bay-ɗigerta tuta.