Read Masana LAW MA NIR-NIRAMNA 11 Bible Online

LAW MA NIR-NIRAMNA 11 - Masana bible

LAW MA NIR-NIRAMNA 11

¹Va ma ŋa nekka ma may hay liyamɗina, Ma-Vatɗina may firi kalamɗi, may ŋaɓta ta hay liya'ta firiyim dikamu.

²Hay li ma jigal-tuwta maawa, burahta ma kaw; may yalda ka hiɗi sa hot yisi gaana.

³Ɗigerta vi sum sa gasina tun voksiya, may hagata gunita vi sa di newta muɗ kisiya kay ɓulaksi goyo.

⁴Farayna may gutɗi hay buura vi ɦiyda, may ɗigerta but san goy vun mitta.

⁵Ɗigerta vi sa ma gasina, muɗ hagata valam gasiya, may sa ma joona puk gaa'a kuɗ joota valamu.

⁶Ɗigerta vi sum sa gasina butsi goyo, may kuɗ goslta visiya, sa di newta juni hay jawta.

⁷Hay buur ma mitta vi sa ma joona, cubta-sle'ta valamu vatis goyo, niŋata vi sum sa sulukŋa vatsi goyo.

⁸Sa ma ɗigera buti goy vun-zlata, sa ma joona vurna hay baŋalamu.

⁹hiɗi vunamu sa ma liwisna ba sugolomna goyo, may sum sa ɗigera buti goyo kay wida visiya.

¹⁰Hay li ma sa ɗigera ka firiya, hoyok-ziyna wul kulo'o, may hay li ma sum sa jiw-zlat mit goyo, hoyok-ziyn li firiya.

¹¹hiɗi bolda vi sum sa ɗigera, hoyok-ziyn wul kulo'o, may vunna vi sa joona ɦom gaa'a.

¹²Sa ma pan sugolomna nam ɦay-ɦaya, may sa ma ka hiɗi yamda-wida mus ŋali.

¹³Sa yaw dira pat caw sle ma ŋayayn goyo, may sa ma varta valam ɗigere ŋay slena.

¹⁴Hay li ma sum sa ɗek yalda sayɗi, sumun mit ŋolo, la sum sa ɗek yalda ka ŋolo, sumun suɗ goyo,

¹⁵sa ma va' talam kay ziy lawta hay baŋal sa mara'a, nam kal hay joota, may sa ma min vun ma ŋiraynɗina nam fi sle'ta.

¹⁶Cata ta slugota fi gajijita, may jufay sa waskayna fum mi faraya.

¹⁷Sa ma hum-vunna li ŋaata tam ciwta valamu, may sa ma ci matna hiwir ciwta valamu.

¹⁸Sa ma poyna fi tina vi ɗutta, may sa ma was ɗigerta ma fi wurakŋa ma gasina.

¹⁹Ki kayn nala ɗigerta nar san tam irita, may sa ma jaŋ kuɗ joota co tam mitta.

²⁰Nisi sa diksi gunina liwisi kir Ma-Vatɗina, may slugota valamu ka hay hagata vi sa ɗigera.

²¹Gasi wete, sa joota fi pir goy kay kitatɗi, may jafna vi sa ɗigera ma fi butta-goyta.

²²Cata ta jifiya may bay yali, na'ŋray ca ki tuju ma ora hay cin bagumna nala.

²³Darta vi sum sa ɗigera ti ŋaata tuta; may va ma sum sa bay-ɗigera cubumna mi ɦiyda tuta.

²⁴Sa ma vul slen mi sumun ŋolla muɗ faraya, may sa ma ŋay slen goy suw kafna, muɗ muɗi hawi.

²⁵Sa ma was bolda ma mus hay ŋaata, ma vul niy ma cina mi segena ma fi niyna kay laata valamu.

²⁶Sa ma min gus alkamaren goyɗina sumun ma ŋulumu, may bolda ka kay sa ma gus slen goyna.

²⁷Sa ma gar ŋaata dok-doko ma fi slugota, may sa ma tuɗ kuɗ joota ma nig gaa hay zulla.

²⁸Sa ma tun vida valamu kay farayna valamu nam ma ba'a, may ma ɗigera ma tun caw goɗ ki hum-guna nala.

²⁹Sa ma mar lawt kay ziyna valamu ma yaw vocota vi simeɗna, ma bay-yalla ma muɗ mi gorvona vi sa yalla.

³⁰Vuɗna vi lopna vi sa ma ɗigera mi guna vi irita, sa ma yalla yaw ŋalda vi sumun kuɗumu.

³¹La sa ma ɗigera fi wurakŋa valamu gaa kay nagat tani, sa ma joona hiɗi sa ma sulukŋa ma fi wurakŋa visi suw kayni sem gaage?