Read Masana LAW MA NIR-NIRAMNA 12 Bible Online

LAW MA NIR-NIRAMNA 12 - Masana bible

LAW MA NIR-NIRAMNA 12

¹Sa ma min ala sa ɗekem kiramu min wida; sa ma min ala sa bayamɗi nam to'ofaya.

²Sa ma li ŋaata nam fi slugota vi Lawna, may Lawna ka kitat kay sa ma li yal ma joona.

³San as muɗ dono'o kuɗ joota valam noŋɗi, may sa ma ɗigera sutayna valamu as ge'ɗi.

⁴Cata gasita na' mi bogoray ma kay jufa'na, may na' ta muɗ jufa' zulota ŋray ca ki juful ma mut zok sana nala.

⁵Varta vi sum sa ɗigera coli kay gasita may poyta vi sum sa joona na' ti ɗutta.

⁶Yoboyna vi sa joona gan jawt vok sumuna kay ɦok busuw goyo, may vun sum sa ɗigera butsi goyo.

⁷Sa joona cukawa gaa'a, nisi fi yaw kuloɗi, may jafna vi sa ɗigera ma mus ta-ta.

⁸San as fi suburta kuɗ varta valamu ta ŋaata, may sa ma dikam joona nam mar burahta.

⁹Mus hay hawta hiɗi gorvona vo kaŋ kepe, kayni suw sa ma subur tuwamu, may va ma tin may hay ziyna valamɗina.

¹⁰Sa ma ɗigera kot tuw farayna valamu, may sum sa joona diksi min ci mati.

¹¹Sa ma zum sinena valamu ma fi tina, may sa ma li lop kay slen ma waana ŋalda valamu tayɗi.

¹²Sa ma joona niŋa sle ma sum sa joon yawamna, may sutayna vi sa ma ɗigera vuɗna valam ka'a.

¹³Sulukŋa ma hay vun sana jawta ta gunita ka haya, may sa ma ɗigera hulot goy vun zlata.

¹⁴Kuɗ dita vi vunamu sana hob hiɗi sle ma ŋaana, gigekaw fi slena kuɗ lopna vi ɓalamu.

¹⁵Hagata vi sa ma ɦay-ɦayna kiram ɗigere, may sa ma hum gatta nam yali.

¹⁶Sa ma ɦay-ɦayna ɗek va ma tum dikamna goy gosoyo, may sa ma ŋalla mus kiliŋ la nam hum ŋulda kaw.

¹⁷Sa ma di gasit goyo nam gut kuɗ lawta ɗigerta, sa ma di law ma hay liyamɗina nam gut kuɗ sinda.

¹⁸Law ma waa ɗar-ɗaara ka tuw san mil ki kew-gaferaŋa nala, may dita vi sum sa yalla mar yerta-goyta.

¹⁹Yoboy ma hiɗi gasita mus ta-ta, may yoboy ma hiɗi sinda may mus noŋɗi.

²⁰Ɗutta ka hay dik nisi sa var joo'o, may firita ka'a kay nisi sa ɗek yal toyta.

²¹Sa ma ɗigera bakmaran may fumɗi, may sum sa joona lasta visi ma li ŋolo.

²²Dita ta joota kir Ma-Vatɗina liwisi, may nisi sa ka hiɗi vida ma fi slugota valamu.

²³Sa ma yalla ŋay wida valam gaa'a, may sum sa ɦay-ɦayna siwel ɦoyta visi goyo.

²⁴Sa ma ɓalam li lopna ma kol kay sumuna, may ɓamta ta liŋiriyta ma ti gorvota.

²⁵Yorta vi dikga muɗ san neke, may yoboyn ma ŋaana lum firiya.

²⁶Sa ma ɗigera mi sa ma tuni vok sa ma poy kuɗumna, may hagata vi sa joona viysi goyo.

²⁷Sa ma liŋiriyna as fi muur ma nam cufum sliwamɗi, may faray ma ŋaana vi san kayn ala nam li koloyo hay lopna.

²⁸Ɗigerta tuɗaŋ hay irita, hagata na'ta naraŋ tam mittaɗi.