Read Masana LAW MA NIR-NIRAMNA 13 Bible Online

LAW MA NIR-NIRAMNA 13 - Masana bible

LAW MA NIR-NIRAMNA 13

¹Goor ma yalla hum ɗekka vi bulumu, may sa ma burahta may hum gattaɗi.

²Kuɗ vuɗna vi dita vi vunna, gigekaw ti va ma ŋaa'a, may tin ma sum sa di newta garamna kayni ti waskayta.

³Sa ma ŋom vunamu ŋom ciwta valamu, may yoboy ma dak-dakŋa tuɗaŋ hay ba-goyta.

⁴Sa ma zulomda darta valam may hobɗi; may sa ma li lopna hayam ma hoba.

⁵Sa ma ɗigera ka gaw hiɗi yoboy ma sinna; may sa ma joona muɗ tuwam puru, nam ɓulak diki kaw.

⁶Ɗigerta ŋom sa ma dikam ɗigera, may joota slew sa ma sulukŋa.

⁷Sa hena li tuwam ki nam faraya nala, may va valam mayɗi, sa hena li tuwam hawi, may nam ka hiɗi slena.

⁸Sa ma farayna, farayn as butum goy vun lawta, may sa ma hawna li nar kay lawtaɗi.

⁹Haraŋa vi sum sa ɗigera firi dik sa'a, may fitilla vi sum sa joona tew goyo.

¹⁰Sli-yamda kulota mar ci-wayta, may yalda ka hiɗi sa hum gatta.

¹¹Faray ma fum hiɗi hagata gunita raŋ goyo, may sa ma hurok farayn hiɗi ŋali ŋali li faray ŋolo.

¹²Varta ta ɓuraway gaata muɗ dik san moyo, may varta ta hay liya'ta ti guna vi irita.

¹³Sa ma burah yoboyna ma wurak ŋolo, may sa ma li nar kay vun-ma-gatna ma fi wurakŋa.

¹⁴Hatta vi sum sa yalla na' mi guna vi irita, na' suɗaŋ goyo hay jawta vi mitta.

¹⁵Varta ta ŋaata vuɗ slugota, may hagata vi sa di newta dabta va' mayɗi.

¹⁶Sa ma yalla marige kaw li hiɗi wida, may sa ɦay-ɦayna pat dir to'ofta valam goyo.

¹⁷Sa ma di sunda joona tupa kay joota, may sa ma di sunda hay liya'na mar yerta-goyta.

¹⁸Hawta hiɗi zulota kay san gigekaw ma noy hatta goyo, may sa ma humam jak kay gatta ma fi suburta.

¹⁹Darta ta vuna' hobay kulota na' ŋaa'a kay ciwta, may musta ta gine hiɗi joota kayni liwis kir sa ɦay-ɦayna.

²⁰Sa ma poy hiɗi sum sa yalla muɗ yali, may sa ma vi bonota hiɗi sa ɦay-ɦayna ma fi lasta.

²¹Joota ka kuɗ sa sulukŋa, may ŋaata mi wurakŋa vi sum sa ɗigera.

²²Sa ma ŋaana vocota valam co ta-ta tam gurona vi gurona valamu, may sa ma sulukŋa farayna valamu muɗ goy vi sa ma ɗigera.

²³Sine ma sa ma hawna zumumna li wan ŋolo, may wa namna ba goyo kuɗ bay-ɗigerta valamu.

²⁴Sa ma tel libetna goyo kay goora valamu may minimɗi, may sa ma min goora valamu gar kay watamu.

²⁵Sa ma ɗigera ti'e, hob kaw, may sa ma joona as hobɗi dok-doko.