Read Masana LAW MA NIR-NIRAMNA 14 Bible Online

LAW MA NIR-NIRAMNA 14 - Masana bible

LAW MA NIR-NIRAMNA 14

¹Cata ta yal suw boyn kafta in ziyna va' kulo'o, may na' ta bay yalla ɦo ziyna va' gaa'a hiɗi ɓa' kay tuwa'a.

²Sa ma poy hay ɗigerta li nar kuɗ Ma-Vatɗina, may nam ma sli hagata ta gunita ka pan Ma-Vatɗina.

³Dita vi sa ma ɦay-ɦayna watam hiɗi tilekŋa kay subur-tuwta valamu, may dita vi sum sa ɗigera ŋomsiya.

⁴Hay li ma luway-jufayn mayɗi, balak ma lak zugolla hini goy ɦawa'a kaw. San fi sle ma tin ŋol kayn kuɗ luway ma zumna.

⁵Sa ma di-goyna ma gasina ka sinɗi, may ma bay-gasina was sinda ŋolo.

⁶Sa ma burahta gar yalda may nam fa' noŋɗi, may kay sa ma ka hiɗi yam ta wida, wida may kalam lop ŋolɗi.

⁷Poy hiɗi sa ma bay-yallaɗi, kay wida may hay vunam noŋɗi.

⁸Sa ma yalla yalda valamu ti ɗigerta vi hagata valamu, to'ofta vi sa ma bay-yalla kayn ti ɗutta may.

⁹Sa bay-yalla miyes ɗifinna ma kay sulukŋa, may jar sum sa ɗigera slugota ka'a.

¹⁰Dikga kay tuwa'a wi va ma la' yora, sa mara'a as muɗa' firiɗi.

¹¹Ziyna vi sa ma joona ma ɦo gaa'a, may ziyna vi sa ma ɗigera ma goɗ ki guna nala.

¹²San hen var ala hagata valamu ɗigere, may hay ya' ma dabna na'a ti hagata vi mitta.

¹³La jar cenda kaw dikga as fi yorta, may hay yam ma dabna, firita as muɗ goy yorta.

¹⁴Sa ma dikam viy goyo hob hiɗi hagata (vi viy-goyta) valamu, may sa ma ŋaana dikam hob hiɗi va ma ŋaa ma hayamna.

¹⁵Sa ma bay-yalla vi kuɗ dit kaf, may sa ma yalla tun ŋalda valam tam tu'da valamu.

¹⁶Sa ma yalla li nar kay joota, mus goboy hiɗi na'ɗi, may sa ma ɦay-ɦayna tuɗ vokomu, varɗi kaw.

¹⁷Sa ma muɗ ɦiy waana nam ɦay-ɦaya, sa ma ka hiɗi varta joota mar hunayt kalamu.

¹⁸Sum sa ɦay-ɦayna vocota visi ti to'ofta, may sum sa yalla bogorayna visiya ti wida.

¹⁹Sa joona girif gaa vok sa ŋaana, sa sulukŋa lak hay vun-galana vi sa ma ɗigera.

²⁰Sa ma hawna noyay goy kay sugolomna, may nisi sa min sa ma farayna ka ŋolo.

²¹Sa ma miyas sugolomna li suluku, may sle'ta ka kay nisi sa wi haw sum sa maŋayna.

²²Nisi sa var kay li joota kay sugolaysina, may ba goyɗi su? May nisi sa var kay li ŋaata, var kay ŋaata-ŋolda hiɗi gasita.

²³Hay lopna kaf fita ka'a, may yoboy ma goy valamna nar san hay kiɗata.

²⁴Bogorayna vi sum sa yalla mi farayna, to'ofta vi sa ɦay-ɦayna hinsi hay ɦay-ɦayta visiya.

²⁵Sum sa li di-goyta ta gasita but ciwta goyo, may nam ma ka sinda hobay hiɗi ɗutta.

²⁶Sa ma li nar kuɗ Ma-Vatɗina vida valam ka tuni kalamu, gurona valamu ma fi liyn ma ŋayna.

²⁷Narta kuɗ Ma-Vatɗina ti kaata ta law niyna vi irita, kay suɗ san goy hay jawta vi mitta.

²⁸Hay li ma sumun ka ŋolo, kayni ti suburta vi mulla, hay li ma sumun kiɗay goyo, kayni ti ɓulakka vi sa yerimana.

²⁹Sa ma muɗ ɦiy gosoyɗi nam yal ŋolo, may sa ma muɗ ɦiy gosoyna was ɦay-ɦayta valam goyo.

³⁰Dikga ta tuni ŋal kiliŋga kayni mi irita vi tuwna, may hunayta mi jufulla ma ti zokŋa.

³¹Sa ma las sa ma hawna ŋul sa ma kotomna, may sa ma lisi slugota subur sa ma kotsina.

³²Sa ma joona gum gaan ti joota valamu, may sa ma ɗigera fi liyn ma ŋayna ta-ta hay mitta valamu.

³³Yalda ka musi hay dik sa ma yalam wina, ta-ta jar sa ɦay-ɦayna kaw na' ɗek tuwa' goyo.

³⁴Ɗigerta wul jaf-sumun kulo'o, may sulukŋa hot yam sumun gaa'a.

³⁵Slugota vi mulla ka kay sa ma sunda ma poŋ ir slena, may ɦiyda valamu ka kay sa ma li sle ma zulona.