Read Masana LAW MA NIR-NIRAMNA 15 Bible Online

LAW MA NIR-NIRAMNA 15 - Masana bible

LAW MA NIR-NIRAMNA 15

¹Hot dita ta lumaɗa tun ɦiyda gaa'a, may yoboy ma ɗeŋŋa fok ɦiyda kulo'o.

²Vun sum sa yalla muɗ wida ŋaa suwa, may dita vi sa ɦay-ɦayna hobay hiɗi to'ofta.

³Ir Ma-Vatɗina ka cuki hay liyn kaf, nam ka ɗuw kay sa ŋaana hiɗi sa joona kaf.

⁴Dita ta ŋalda kayni mi guna vi irita, may dita ta joota muɗ ŋusta yora.

⁵Sa ma ɦay-ɦayna kus gatta vi bulumu, may sa ma yalla humam jakay kay gatta.

⁶Slen ka ŋomi ŋolo hay ziyna vi sa ma ɗigera, may hiwirta ka ŋolo hay fita vi sa ma joona.

⁷Yoboyna vi sa ma ɗigera was wida, may hay dik sa ɦay-ɦayna cubta-sle'ta tayɗi.

⁸Ɗifinna vi sa joona liwis kir Ma-Vatɗina, may siɗawta vi sa ɗigera nam li slugot ka'a.

⁹Hagata vi sa joona liwisi kir Ma-Vatɗina, may nam min sa ma tuɗ kuɗ ɗigerta.

¹⁰Sa ma raw hagata goyo gatta donota ka kalamu, may sa ma noy gatta goyna ma fi mitta.

¹¹Liyn ma musta vi sa mitina, hiɗi zul ma wiŋŋa vi ba-goyta ir Ma-Vatɗina, nam as wi dik sana suw kayni sem gaage?

¹²Sa ma burahta may min ala sa ɗekemuɗi, nam may tuɗ tam sa yalla noŋɗi.

¹³Dikga ta hay firita muɗ ir san wile'e, may la dikga ka hay zumalda, sutiyaŋ as to'o.

¹⁴Dikga ta ka hiɗi yalla gar wida, may dikga vi sa ɦay-ɦayna hobay hiɗi to'ofta.

¹⁵Sa ma hawna buurta valam kaf joo, may dikga ta hay firita ka hiɗi yuldeta hay buurta kaf.

¹⁶Slen ka hay ɓaŋ neeɗa ɦawa, hiɗi narta kuɗ Ma-Vatɗina, kayni marya suw faray ma dak-daki, may hay hiwirta.

¹⁷A ti wayaŋŋa ɦawa'a jar minda kayni, marya suw sa ma ti sliw put ma ɗorayna, may tum jar gawta.

¹⁸Sa ma fok ɦiy gosoyo mar cirepta, may sa ma muɗ ɦiy gosoyɗi tun ci-wayt gaa'a.

¹⁹Hagata vi sum sa poyta zlaɓi hiɗi zigiyna, may hagata vi sa ɗigera tori goyo.

²⁰Goor ma yalla vul firita mi bulumu, may sa ma ɦay-ɦayna ɗuw sulum birek-ceke.

²¹ɦay-ɦayta mi firita vi sa ma bay-yalla, may sa ma yalla poy ɗigere hay hagata valamu.

²²La ŋra-vunda tayɗi, slen ma nay min lumna as tuɗi, may slen as tuɗa la sa vul gatta ka ŋolo.

²³San as li firiya hiɗi hot-dita vi vunamu, yoboyna ma diy hay liyamu ir liyn neeɗa, vul firita mi sumun ŋolo kaw.

²⁴Sa ma poŋ ir slena hagata vi su'da naram kulo'o, kay jaram ma ja goy hiɗi liyna vi mitta, ma nar san gal gaa'a.

²⁵Sum sa sli yisi kulona Ma-Vatɗina ɦo ziyna visi gaa'a, may boy sa duhulla nam muɗ ziyna visi dono'o.

²⁶Varta ma joona liwisi kir Ma-Vatɗina, may yoboyn ma jifiyna kiram ŋaa'a.

²⁷Sa ma min gar slena hiɗi hagata gunita hiwir ziyna valamu, may sa ma ka gaw hiɗi slen ma yawam hay ɓam sumuna ma mus iriya.

²⁸Dikga vi sa ma ɗigera jiɓer kay hot dita, may vun sum sa joona di yoboy ma joona kaw.

²⁹Ma-Vatɗina ka goy gine'e hiɗi sum sa joona, may nam hum siɗawta vi sa ɗigera.

³⁰Ira ma wilena firi dik sana; labara ma ŋaana vul donota mi ɓetna vi tuw sana.

³¹Sa ma tun humam jiger tam gatta ta tuɗ tam irita, ma mus jar sa yalla,

³²sa ma noy gatta goyo ka las ciwta valamu, may sa ma humam jaki tam gatta ma fi yalla.

³³Narta kuɗ Ma-Vatɗina hay yalla mi sana, sa ma hot yalam gaana fi suburta.