Read Masana LAW MA NIR-NIRAMNA 16 Bible Online

LAW MA NIR-NIRAMNA 16 - Masana bible

LAW MA NIR-NIRAMNA 16

¹Sana as var kay li slena hay dikamu, may hot dita na'a vi Ma-Vatɗina.

²Hagata vi sana kaf vokom ɗigere, may nam ma fek ŋusta vi sana mi Ma-Vatɗina.

³Hin lopna vaŋ hay ɓam Ma-Vatɗina, nala slen ma naŋ min lumu vunam ma hoba.

⁴Slen ma Ma-Vatɗina kotomna kaf dabta valam ka'a, sa ma joon kaw nam kotom kayni kay buur ma joona.

⁵Sum sa subur tuwsin kaf liwisi kir Ma-Vatɗina, may nisi ma hin bay fi kitatɗi.

⁶Por jiw-zlata hiɗi ŋaata ŋolda, hiɗi gasita kaw, hiɗi narta kuɗ Ma-Vatɗina san as cal goy hiɗi joota.

⁷La poyta vi san ka ŋaa'a kir Ma-Vatɗina, sa gaw kalamna kaw Ma-Vatɗina muɗsi diksi a minimu.

⁸Va ma neeɗa hay ɗigerta, suw faray ma dak-daki may hay bay-gasita.

⁹Dik sana var kay hagata valamu, may vulum donot mi Ma-Vatɗina.

¹⁰Dita vi Lawna ka hay vun mulla, nala hay kitata vunam ma di bay-ɗigertaɗi.

¹¹Va ma ŋa nekka hiɗi dutta-kusta ma hay liyamna kir Ma-Vatɗina ŋaa'a, buhu ma cuk slen hayna kaw kotom mi namu.

¹²Lop ma joona liwisi kir muliyana, kay zlamda-mulda muɗ dono kayni kuɗ ɗigerta.

¹³Dita vi sum sa ɗigera kir muliyan ŋaa'a, sumun min sa ma law hiɗi ɗigerta may.

¹⁴ɦiyda vi mulla ki sa ma sunda vi mitta nala, may sa ma yalla sleɗa' gaa'a.

¹⁵La vok mulla ka wile'e, kayni vul irita, slugota vi mulla ki niy ma si gufulda nala.

¹⁶A gar yalla kayni suw ora sem gaage? A gar yam ta wida kayni suw doorota sem gaage?

¹⁷Hagata vi sum sa ɗigera kayni kay cal goyo hiɗi joota; sa ma min mus jigere hay hagata valamu ŋom ciwta valamu kaw.

¹⁸Sli-yam-kulota tuɗ vok ɓulakka, ŋusta-purcakka tuɗ vok ni-gaata.

¹⁹Hot-yamda gaata jar sa yisi hotay gaana, suw ɓurawta vi sle ma ti ɓuraŋŋa, hiɗi sa subur tuwsina.

²⁰Sa ma jiɓer yoboyna ma fi halalda, nala kaw sa ma tun vida valam kay Ma-Vatɗina ma fi bolda.

²¹Sa ma dikam yali ma yumis ala sa ma ka hiɗi yam ta wida, vun ma di lumaɗna jor wida.

²²Sum sa ka hiɗi yalda fi irita, sum sa to'ofayna kitata visi kayni ti to'ofta.

²³Sa ma dikam yali vunam di sle ma yali kaw, wulda vi wida valamu ka hay vunamu.

²⁴Yoboy ma ŋaana ŋray ca hiɗi yumda ta jibetta, kiliŋga vi ciwta yer san goyo.

²⁵San var ala hagata valam kiram ŋaa'a, may hay dabta ti hagata vi mitta.

²⁶Sa ma li lopna mayta zutum hay lopna, kay vunam ka zutum hay lopna.

²⁷Sa ma wi vaɗina kot joota kay tuwamu, dita vi vunamu ki kuta ta ŋalda nala.

²⁸Sa ma joona fok ci-wayta, sa teflena[3] ɓuraw jar boniyom tuwsin goyo.

²⁹Sa ma waskayna ɗut sugolomna, naram hay hagata joota.

³⁰Sa ma duk iramu kay di yoboy ma gunina, sa ma mut vunamu, joot hobawa hayam vatiya,

³¹Votna mi bogoray ma jifiy ŋolo; san fum kayni hay hagata vi ɗigerta.

³²Sa ma muɗ ɦiy koloyɗina suw sa ma donona, sa ma tel tuwamna suw sa ma kol kay hoyok-ziyna,

³³san as li ŋaɓta kuɗ ɦayta hay vun-sligara, may col lawt kaf kayn mi Ma-Vatɗina.