Read Masana LAW MA NIR-NIRAMNA 17 Bible Online

LAW MA NIR-NIRAMNA 17 - Masana bible

LAW MA NIR-NIRAMNA 17

¹Fu ma logosayna ma san musi losom hay ziyna valam hay sle'ta damna, suw ziy ma hotay hiɗi sliwn hayamu, may hobay hiɗi ci-wayta.

²Sa ma sunda ma poŋ ir slena kol kay goor vuɗina ma mar zulota. Kay nam ma fi vocota jar sum sa vuɗina.

³Ora yorom hay fuura, doorota yora' hay zulla, may nam ma fek dikga kafna mi Ma-Vatɗina.

⁴Sa ma li lop ma joona, ŋalda valam tuni dok-dok kay yoboy ma joona, ma sinda kaw humam jaki jak' kay sinda.

⁵Sa ma ŋul sa ma hawna ŋulum mi nam ma kotomna, sa ma firi kay lasta vi sugolomna suɗ goy vun kitatɗi.

⁶Bogorayna vi sa maariyana kayni si guro-ŋolona visiya, nala kaw ganta vi gurona kayni si sumaysiya.

⁷Yoboy ma iram poŋina may ŋaa kay sum sa to'ofaynɗi, yoboy ma sinda nala kay sa ŋulona kaw.

⁸Sle ma vulda ŋray ca ki hiɗiy ma ŋaana kir nisi sa fumna, nala la nisi muɗ irsi arige kaw, nisi as fi'e.

⁹Sa ma vul gida gar minda, sa ma gi hum sumun kay lawta ɓuraw boniyom tuwsina.

¹⁰Ɗek-kirta gut sa ma yalla, suw wat ma kisna ma wat sa ma to'ofayn hiɗi namna.

¹¹Sa ma joona gar kay fok lawta tuta, may sunda ma ci sumuna ma giys katamu.

¹²A ŋaf hiɗi urse ta gurona va' yaway goyta, kayni ŋaa suw kay ŋaf hiɗi sa ma ɦay-ɦayta hay to'ofta valamu.

¹³Sa ma hot joota kay ŋaata, makka jara' may ja goy hiɗi ziyna valamɗi.

¹⁴Sa ma fok cirepta ŋray ca hiɗi sa ma kus damna; hay li ma winekŋ tun caw fok kulo kayni, vaŋ tuwaŋ goyo.

¹⁵Sa ma ka kitata ŋaata kay sa ma joona, hiɗi sa ma ka kitata joota kay sa ma ŋaana, nisi ma' pet liwisi kir Ma-Vatɗina.

¹⁶Gurjuta hay ɓam sa ma ɦay-ɦayna as gutum hiɗi mige? Gutum kay gus yalda su? May yalla valam mayɗi.

¹⁷Banaŋa as minaŋ hay liyn kaf, ɓasuŋŋa ka kayni kay gutaŋ hay vun-zlata.

¹⁸Sa ma bay-yalla yi va kalamu, nam col tuwam hay baŋal sugolomna.

¹⁹Sa ma min cirepta minim kayni mi sulukŋa, sa ma in vun-galana valam kulo fiyokŋa gara' ti ɓulakka.

²⁰Sa ma bay-gasita hay dikamna fi sle'taɗi, sa ma vunam di joona gi tuwam hay lasta.

²¹Sa ma vuɗ sa ma ɦay-ɦayna ti dikga may hinimɗi, sa ma guruɗi goyna bulum dok-dok hay yorta.

²²dikga ta firita mi gurgunu ma ŋaana, may ŋusta ta maŋayta yaw donota vi zokŋa goyo.

²³Sum sa joona yaw sle ma dugun-vunna goy ŋayaya, kay slugut hagat vok sa ma ɗigera.

²⁴Yalda ka goboy hay liyn kaf tam sa ma yalam wina, may ira vi sa ma ɦay-ɦayna ka ŋuy liyn hay nagat kaf.

²⁵Goor ma bay yalla vul ti-dikga mi bulumu, nam vul galakka mi sulum ta vuɗumta.

²⁶Kayni may ŋaa noŋ ne'ɗi, kay tun wurakŋa kay sa ma ɗigera, may ŋaa noŋɗi kaw kay wat sum sa ŋulona kuɗ gasita visiya.

²⁷Sa ma fek dita vi vunamu nam ka hiɗi wida, sa ma ka hiɗi ŋusta kiliŋga nam mi sa ma yali.

²⁸La sa ma to'ofayn musawa ŋal kiliŋi, nam muɗ mi sa ma yali; sa ma duk vunamu nam mi sa ma ka hiɗi yamda-wida.