Read Masana LAW MA NIR-NIRAMNA 18 Bible Online

LAW MA NIR-NIRAMNA 18 - Masana bible

LAW MA NIR-NIRAMNA 18

¹Sa ma min mus goy valam kepna gara' ti darta vi dikam tuta, nam muɗ ɦiy kat gasita kafe.

²Sa ma ɦay-ɦayna dikam may tum kay yamda-widaɗi, nam garam kayni mi va ma dikam dum kalamna tuta.

³Hay li ma sa ma joon co'o, panta co kaw, hay li ma ŋulda co'o, zulota co kaw.

⁴Yoboy ma may goy hay vun sana ŋray ca hiɗi niy ma zulla; liyn ma yalda may goy hay pana jaŋ goy ki niyna nala.

⁵May ŋaa'a kay tap varta hiɗi sa ma joonɗi, kay nam ɓulak hagata ŋaa'a vok sa ma ɗigera.

⁶Sa ma joona vunam tap hiɗi ci-wayta, vunam yi libetna kalamu.

⁷Yoboyna vi sa ma bay-yalla mar ba-goyta kalamu, vunamu gan jawta vok ciwta valamu.

⁸Yoboyna vi sa ma sinda ki tin ma jibetna nala, nam kal ta-ta gaa hay ruwat sana.

⁹Sa ma cuk ɓalam gaa kuɗum hulos' hay lopna valamu, nam mi ɓasum sa ma ɓulak slena.

¹⁰Semda vi Lawna ŋray ca hiɗi simdir ma donona; sa ma ɗigera jaŋ kay ŋay haya, va as fumɗi.

¹¹Sa ma farayna, farayna valam mi hoyok-ziy ma donona, niŋata valam ala: Kayn mi gulmun ma giy talamna.

¹²Jew a san ɓulak kayni, dikam sli yam tuwam kulo'o, sa ma hot yalam gaana fi suburta.

¹³Sa ma hot dita jew bay nam huma, kayni ŋray ca hiɗi to'ofta hiɗi tiwinta.

¹⁴Varta vi sana gutum vun moyna, may sa ma sutiyam toyna, musum kulo ɗawn mi gige?

¹⁵Dikga ta yalda fi wida, humda vi sa yalla gar wida kaw.

¹⁶Vulda-ɦawata vi sana mal hagat vokomu, vulum liyna kay nam co tam sa ŋulona.

¹⁷Sa ma di lawta valam jewna lawta valam hay liya'a, la sa ma lawt ka jarsin coowa, nay as fek lawta.

¹⁸Ŋaɓta kuɗ ɦayta vat cirepta, ɓuraw jar sum sa dono sa ma'na.

¹⁹Ɓasumna ma san nefemna muɗ hirliŋi ki hoyok-ziy ma gulmun talamna nala, cirepta ɗeŋ ŋray ca ki vun-ziyna vi mulda nala.

²⁰hiɗi vuɗna vi vunamu san hob hayamu, hiɗi vuɗna vi dita valamu nam hoba.

²¹Mitta hiɗi irita ka hay gaŋeraŋa vi vunna, sa ma min kayni ma ti vuɗna va'a.

²²Sa ma fi cata nam fa' kayn ti ŋaata-ŋolda, nam fa' kayn ti slugota vi Ma-Vatɗina.

²³Sa ma hawna law hiɗi giɗel-delta, may sa ma mayanda law hiɗi delem ɗeŋe.

²⁴Sa ma boniyomna ka dak-dakŋa nisi as maram joo kalamu, may banaŋ ma juni hiɗi naŋŋa suw ɓasuŋŋa.