Read Masana LAW MA NIR-NIRAMNA 19 Bible Online

LAW MA NIR-NIRAMNA 19 - Masana bible

LAW MA NIR-NIRAMNA 19

¹Sa ma hawna ma poy hiɗi ɗigerta vi dikga, nam ŋaa suw sa ma law guniya ma ɦay-ɦayna.

²Bay-wida na' may ŋaa kay sa kep noŋɗi, sa ma sukam kelemna nig gaa hay sulukŋa.

³ɦay-ɦayta vi sana slugut hagata valamu, may dikam ɓulak kayni kat Ma-Vatɗina.

⁴Sa ma farayna boniyomna ka ŋolo, may sa ma hawna boniyomna ɓuraw goy hiɗi namu.

⁵Sa ma li di-goyta ta sinda lop bay fi kitatɗi, sa ma ka sinda as hulot goyɗi kaw.

⁶Sumun ŋolo subur sa ma ŋolla, gigekaw gar as li bono hiɗi sa ma vul slena.

⁷Sa ma hawna ɓosiyomna kaf kaam gawi, may boniyomna mer goy talamu sem gaage, la nam gar a tap hiɗi nisi kaw?

⁸Sa ma fi yaldawa min ciwta valamu; sa ma ŋom yamda-wida fi ŋaata.

⁹Sa ma li di-goyta ta sinda lop bay fi kitatɗi, sa ma ka sinda ma ba goyo kaw.

¹⁰Lop ŋolo kay sa ma ɦay-ɦayna, a mus mulu jar farayna, nala kaw lop ŋolo kay sa ma gorvona a ti mul kay sa vuɗina.

¹¹Sa ma ka hiɗi yalda as muɗ ɦiy gosoyɗi, gajijita valam kayni mi yalam ma jok law ma joona.

¹²ɦiyda vi mulla ŋray ca ki zlon ma ci gum nala, may slugota valamu ki maɗay ma hum usna nala.

¹³Goor ma ɦay-ɦayna mi bakmarana kay bulumu, cata ta cirepta na' ŋray ca hiɗi ziy ta sutta.

¹⁴Ziyna hiɗi farayna san as fum voco kuɗ bulumu, may cata ta yalda na' ti vulda vi Ma-Vatɗina.

¹⁵zulomda gi san gaa hay senda ŋolo, sa ma liŋiriyna mayt ma cumu.

¹⁶Sa ma ŋom vun-ma-gatna ŋom ciwta valamu, may sa ma jiɓer kay kaynɗi ma fi mitta.

¹⁷Sa ma wi haw sa ma maŋayna ni bal mi Lawna, nala Lawn ma hotom ŋaa na'ta.

¹⁸Gat goora vaŋu, kay cubta-sle'ta ka tuwa, may naŋ ma gar kay cum goy matɗi.

¹⁹Sa ma ɦiyna nagay kay ziy tuw-tita; kay la naŋ butum goyo, naŋ ɗawn ma hot kalam lo.

²⁰Humaŋ gatta, vaŋ hatta, kay naŋ ma li yali hay buur ma vokŋa.

²¹San ka hiɗi varta hay dikamu kay li slen ŋolo, may hob kulo kayni ti minda Ma-Vatɗina tuta.

²²Tiy sem san kayni ti ŋaata valamu; sa ma hawna nam ŋaa suw sa ma sinna,

²³narta kuɗ Ma-Vatɗina nar san tam irita, san as kal sen hobaya bay joot fumu.

²⁴Sa ma poyna kal ɓalam gaa hay ŋalayta, may as a nara' kulo vunamɗi.

²⁵Wataŋ sa ma burahta, nala sa ma loyna nam ma muɗ yali; daŋ sa ma yalam wina kiramu, nala nam ma hum caw wida.

²⁶Nam ma ɓulak slena vi bulumu hiɗi digiɗ sulum goyo, kayni mi goor ma mar zulota, mar ɦiyda kaw.

²⁷Goora vanu, may ŋaa kay hum hattaɗi, la hatta na'ta jaŋ jaraŋ goy hiɗi yoboyn ma yalla.

²⁸Sa ma li di-goyta ta gunita nam cen kayn kuɗ ɗigerta, sum sa joona vunsi lig jiw-zlata.

²⁹Kitata ka goboy hiɗi sa ma burahta, libetna ka buri ŋor sum sa ɦay-ɦayna waŋ'.