Read Masana LAW MA NIR-NIRAMNA 2 Bible Online

LAW MA NIR-NIRAMNA 2 - Masana bible

LAW MA NIR-NIRAMNA 2

¹Goora vanu, la naŋ vi yoboyna vanu, la naŋ ŋom gatta vanu kaw,

²la naŋ jak humaŋ tam yalda, la naŋ hot varta vaŋ gaa'a kuɗ wida-yalla,

³Awa, la naŋ yi yalda, la naŋ siwel hiɗi delaŋ kulo'o tam yamda-wida,

⁴La naŋ gara' ki gurjut nala, la naŋ sla' se' ki farayn nala,

⁵Hay na'ta naŋ ma hum caw narta vi Ma-Vatɗina, naŋ ma fi wida vi Lawna may.

⁶Kay Ma-Vatɗina vul yalda, wida hiɗi yamda-wida kali goy hay vunam pa;

⁷Nam ŋom su'da kulo'o kay sum sa ɗigera, nam ŋom kuroŋŋa kay nisi sa tuɗ hay ɗigerta.

⁸Nam ŋom nisi sa poy hay ɗigerta, nam ŋom hagata vi sum sa gasina.

⁹Nala naŋ ma hum caw ɗigerta, kitata ta hay liya'ta, gasita hiɗi hagata ta nar san tam ŋaata kafe.

¹⁰Kay yalda ma may goy hay dikaŋ pa, wida ma sleɗaŋ dikaŋu;

¹¹Varta-yalla ma mus jiger ŋomaŋu, wida-yalla ma ŋomaŋu.

¹²Kay butaŋ goyo kay hagat vi joota, goy hay ɓam sa ma ɓak ɓakŋa ma joona,

¹³Kay butaŋ goyo hay ɓam sum sa noy hagata vi ɗigerta goyo, nisi sa poy hay hagata vi jufunda.

¹⁴Sa diksi li firiya kay li joota, sa diksi firiya hay joota.

¹⁵Sa tuɗ kuɗ hagata ta cali goyta, sa sli hagata ta gunita;

¹⁶Kay butaŋ goyo hay ɓam cata ta pulta, cata ta pulta ta di yoboy ma lumaɗna,

¹⁷ta noy bana'na ma hay wayata va'na goyo, ta ya' jok bonota vi Lawna goyo;

¹⁸Kay ziyna va'a iram muɗi kir mitta, hagata va'a tuɗaŋ hay liyna vi sa mitina.

¹⁹Sum sa tuɗ gara'na mara ma hotay kep kaw mayɗi, nisi as fi hagata vi irita noŋɗi kaw.

²⁰Naŋ ma poy hay hagata vi sum sa ŋaana, naŋ ma ŋom hagata vi sum sa ɗigera.

²¹Kay sum sa ɗigera ma li ziy hay nagata, sum sa bay-sulukŋa ma lak ziy haya;

²²May sum sa joona ma vatis goy hay nagata, sum sa bay-ɗigera ma patis goyo hiɗi so'olsi pa.