Read Masana LAW MA NIR-NIRAMNA 20 Bible Online

LAW MA NIR-NIRAMNA 20 - Masana bible

LAW MA NIR-NIRAMNA 20

¹Vinna mi mul burahta, dolay ma galakŋa mi mul law ma da-dakŋa. Sa ma cum suwiya yalla valam mayɗi.

²ɦiyda vi mulla na' ŋray ca ki zlona ma ci gumna nala; sa ma muɗ mulla ɦiya li suluk kat tuwamu.

³Kayni mi suburta kay sa ma mus goy gine'e hiɗi ci-wayta, may ma to'ofayna hin tuwam haya.

⁴Hay gufulda, sa ma poyna zumɗi, may hay feɗna nam gara, may fi noŋ ne'ɗi.

⁵Varta ta hay dik sana ki niy ma zulla nala, sa ma yalla wi kay go niy haya.

⁶Sumun ŋolo gigekaw di goy kay ŋaata valamu; may sa ma ɗigera, sa ma as kay fumna mi gige?

⁷Sa ma ɗigera poy hay dikga-ɗigerta, sle'ta ka kay gurona valamu bugolomu.

⁸Hay li ma mulla musawa kay zlamda-mulda kay ka kitata, nam poŋ ir joot kaf hiɗi iramu.

⁹Sa ma as di ala nan pori goyo, nan muzi goyo kay sulukŋa vanu, ma as di nala mi gige?

¹⁰Sle ma ŋa nekka kuɗ batam ma', dutta-kusta kuɗ bata' ma', hena hiɗi hena kaf kir Ma-Vatɗina liwisi.

¹¹Goor-goora la poyta valam ma li ŋaa kla, joo kla naŋ wi kayni hay lopna valamu.

¹²Humda kay huma, ira kay ɗuwa, nam ma' pete kotom mi Ma-Vatɗina.

¹³Naŋ ma min sendaɗi, kay na' muɗaŋ hawi; malaŋ iraŋ goyo, nala naŋ ma hob hiɗi funa.

¹⁴Sa ma gus vana di ala: joo'o, joo'o, may hay li ma nam kalawa, nam li firiya.

¹⁵Ora hiɗi kermena ka ŋolo; may vun ma di yalla mi faray ma jifiyna.

¹⁶Yawaŋ sligara valamu, kay nam col tuwam hay baŋal sa mara'a, Yawaŋ sle na deŋŋa hay ɓalamu, Kay nam col tuwam hay baŋal sa ma pulla.

¹⁷Tin ma tum hiɗi ɗutta nam lumaɗ ŋolo, may bugolda nam muɗ vun san hasa-hasa' ki ŋesln nala.

¹⁸Slen vunam hob kayn hay li ma gatta ka'a; nala laŋ duura hiɗi yali.

¹⁹Sa ma yaw dira pat dir ŋayayta goyo; naŋ ma tap kuɗ sa ma mal vunam goynɗi.

²⁰Sa ma ŋul bulumu hiɗi sulumu, irita valamu ma tew ki fitilla tew hay jufunda nala.

²¹Fita ta fa' hiɗi koloyta hay tun cawta, bolda may ka' bugoldaɗi.

²²Naŋ ma di ala: Nan min hot joota kay joota! Naŋ ma di naɗi, may tunaŋ vida vaŋ kay Ma-Vatɗina, nam ma gutaŋu.

²³Ma-Vatɗina ka gaw hiɗi sle ma ŋa nekka ma kuɗ batam ma'na, va ma ŋa nekka ma hay liyamɗina may mi va ma ŋaaɗi.

²⁴Poyta vi sana ŋoma' mi Ma-Vatɗina, may san as kay wi hagata valam su?

²⁵A san yi va kalam hiɗi sle ma peldetna bay varta kayni vum hay jawta, fi varta bugol va ma naŋ yi kaŋu kayni may ŋaaɗi.

²⁶Mulla ma yalla mer sa gawta goyo, taysi gaa kuɗ wur-selemu.

²⁷Sukka ta hay sana ki fitilla vi Ma-Vatɗina nala; na' fek hay san ma kalafna.

²⁸Ŋaata hiɗi gasita ŋom mulla, zlamda-mulda valamu ma tuɗ hay gasita.

²⁹Donota mi ganna vi sum sa joriyona, Ɗuŋus ma haɓna mi ganna vi sum sa maariyana.

³⁰Tuw ma ka goy milla kayni mi gurgununa vi sum sa joona; watta ta cuk ta-ta kalaf hay sana kaw na' nala.