Read Masana LAW MA NIR-NIRAMNA 21 Bible Online

LAW MA NIR-NIRAMNA 21 - Masana bible

LAW MA NIR-NIRAMNA 21

¹Dik mulla hay ɓam Ma-Vatɗina ki niy-ɓatna nala; nam muɗum hay liyn marige kaw ma nam mina.

²Hagata vi san kaf kiram ŋaa'a, may ma fek dik sumun kafna mi Ma-Vatɗina.

³Lita vi gasita hiɗi dikga-ɗigerta, kayni kir Ma-Vatɗina ŋaa'a suw ɗifinna.

⁴Ira ma subur-tuwta, hiɗi dikga ta sli yam tuwa' kulo'o, fitil namna vi sum sa joona mi sulukŋa.

⁵Varta vi sa ma li lopna tuɗum tam fida, may sa ma li hiɗi sukam kelemna tuɗ tam kiɗata.

⁶Faray ma fum hiɗi sinda mi slen ma dol goyo, ma nar san vun mitta.

⁷Waskayta vi sum sa joona narsi tam ba-goyta, kay nisi noy sle ma ɗigera goyo.

⁸Sa ma joona sla' ti hagata gunita, may sa ma bay-joota li slen hiɗi ɗigerta.

⁹Ŋaa'a kay mus hay gef-ziyna suw musta hay ziyna ma tapay hiɗi cata ta vunna.

¹⁰Sa ma joona joot may asam noŋɗi; banamna kaw muɗ kiram haw noŋɗi.

¹¹Hay li ma naŋ wat sa ma ɦay-ɦayna, ma bay-yalla muɗ yali; hay li ma naŋ di sa ma yalla kiramu, wida valam jora.

¹²Ma-ɗigera jak humam tam sa ma joona; nam zut sum sa joona gaa hay joota.

¹³Sa ma duk humam tam tiyta vi sa ma hawna, nam kaw ma tiya, may sa ma humum mayɗi.

¹⁴Vulda ta vuli goy ŋayayta sleɗ ɦiyd gaa'a, vulda-ɦawata ta vuli goy ŋayayta vat ɦiyda-ŋolda goyo.

¹⁵Lita hay liya'ta kayni firita vi sa ma ɗigera, may ba-goyta kayni hagata vi sa li bay-ɗigerta.

¹⁶Sa ma cal goy hay hagata vi yalla, ma tun sukam hay tokŋa vi sa mitina.

¹⁷Sa ma min firita mus hay hawta, sa ma min vinna hiɗi mula as li farayɗi.

¹⁸Sum sa joona vurna hay baŋal sum sa ɗigera, sum sa di newta vurna hay baŋal sum sa ɗigera.

¹⁹Kay mus hay nagata ta hay ful ma wiŋŋa, kayni ŋaa'a suw mus ma mus hiɗi cata ta vunna, ta ɓulak diki.

²⁰Faray ma ŋaana hiɗi mula ka vo hay ziyna vi sa ma yalla; may sa ma ɦay-ɦayna ɓulakam ɓulaki goyo.

²¹Sa ma sli sem ɗigerta hiɗi gasita ma fi irita, fi gasita, hiɗi suburta kaw.

²²Sa ma yalla kal hay hoyok-ziy ma donona, donota ta nisi var ka'a nam ɦo' gaa'a.

²³Sa ma ŋom vunamu, ŋom sinamu kaw, nam ka ŋom ciwta valamu kay lawta.

²⁴Sa ma subur-tuwamna hiɗi sa ma jigal tuwamna, yum ala sa ma burahta; nam li hiɗi waskayta hiɗi ɦawlata.

²⁵Darta vi sa ma poyna ma cumu, kay ɓalam min li lopɗi.

²⁶Nam busa niŋa slen he', may sa ma ɗigera vul va goyo bay giriŋi.

²⁷Ɗifinna vi sa joona nam va ma liwisi; nam liwis suw kayni sem gaage lo hay li ma nisi li ɗifin namna hiɗi varta ta jiw-zlata!

²⁸Di-goy ma sinda ma vat goyo, may sa ma humna ma law dok-doko.

²⁹Sa ma joona turkus vokomu, may sa ma ŋaana teŋ iramu hay hagata valamu.

³⁰Bay-yalla, bay-yamda wida, bay-gatta may fum vok Ma-Vatɗina.

³¹Sana as gan kulumna valamu kay buura vi duura, may kolda na' vi Ma-Vatɗina.