Read Masana LAW MA NIR-NIRAMNA 22 Bible Online

LAW MA NIR-NIRAMNA 22 - Masana bible

LAW MA NIR-NIRAMNA 22

¹Sem ma tiyna suw faray ma ŋol dak-dakŋa, slugota ŋaata va' suw doorota hiɗi ora.

²Sa ma farayna hiɗi ma hawna fi tuwsiya, kotsi kaf kayn mi Ma-Vatɗina.

³Sa ma yalla iram wi joota, nam ŋay tuwam goyo. May sa bay yalla jik ka'a, nisi fi kitata.

⁴Vuɗna vi hot-yamda, vuɗna vi narta kuɗ Ma-Vatɗina, mi farayna, gajijita hiɗi irita.

⁵Zigiyna hiɗi jawta ka hay hagata vi sa ma gunina; may sa ma ŋom ciwta valamu co goboy hiɗi namɗi.

⁶Hat goora hay hagata ta nam ma sli kuɗa'ta, kay hay li ma nam muɗawa ŋolo, nam ma cal goyɗi.

⁷Sa ma farayna ti mul kay sa ma hawna, sa ma ni balla mi gorvona vi sa ma nam mi bal kalamna.

⁸Sa ma was ɗutta feɗ bay-ɗigerta, mulda valamu mus ta-taɗi.

⁹Sa ma ɗuw sa hena hiɗi ŋaata ma fi bolda, kay nam ɓuraw tina valamu hiɗi sa ma hawna.

¹⁰Digiɗaŋ sa ma burahta goyo, nala cirepta ma vat goyo; ci-wayta hiɗi ŋulda ma vata.

¹¹Sa ma min peldetta vi dikga, ma slugota ka hay vunamu, mulla mi banamna.

¹²Ma-Vatɗina ŋom wida, may sum sa ɦay-ɦayna nam muɗ dita visi goy waa'a

¹³Sa ma zulomda di'e: Zlon ka goy jiya, la nan kal goy hay hagata, nam ma can goyo.

¹⁴Vun boy sa pulla kayni mi zul ma wiŋŋa, sa ma dik Ma-Vatɗina ɓulak talamna ma nig gaa hay zul namna.

¹⁵ɦoyta ka juni hay dik goorgoora, tilekŋa vi gatta ma digiɗa' goy gine'e hiɗi namu.

¹⁶Curoɗ sa ma hawna muɗum faray suwa, vul mi sa ma farayna muɗum hawi.

¹⁷Tunaŋ humaŋu kay hum dita vi sa ma yalla; hin dikaŋ tam yalla vanu.

¹⁸Ŋaa'a kay naŋ ma ŋoma' hay dikaŋu, na' ma li tuni hay vunaŋ dok-doko.

¹⁹Kay naŋ ma tun vida vaŋ kay Ma-Vatɗina, nan min hataŋ vaydi, awa naŋu.

²⁰Nan ɗo gatta hiɗi vartawa ŋolo kaŋu hay ɓa-ɓa.

²¹Kayni ɗekaŋ sle ma hay liyamna, kay yoboyn ma gasina, a naŋ ma hot yoboyn ma gasina tam sa ma gaŋayna.

²²Naŋ ma yaw slena vi sa ma hawnɗi kay nam hawi, curoɗ sa ma hawna vun kitatɗi.

²³Kay Ma-Vatɗina gut kuɗ sa hawna, sum sa curoɗsina nam yaw irita visi goyo.

²⁴Naŋ ma li bono hiɗi sa ma ɦiynɗi, naŋ ma poy hiɗi sa ma waskaynɗi,

²⁵kay la naɗi naŋ ma hat hiɗi hagata valamu, nam ɗawni ma gan jawt vok ciwta vaŋu.

²⁶Tap tuwaŋ hiɗi sum sa yi slen kisinɗi, tap hiɗi nisi sa col tuwsi hay baŋal sum sa yaw ballaɗi kaw;

²⁷la va ma naŋ wurakam mayɗi, naŋ min ala nisi ma sli va ma buura vaŋu kay mige?

²⁸Sinena ma sumiyaŋ-ŋolo poŋom iramisna ma jokom jaram goyɗi.

²⁹La naŋ wi sa ma iram yali hay lopna valamu, nam col kayni vok muliyana; nam may col vok sum sa jufunnaɗi.