Read Masana LAW MA NIR-NIRAMNA 23 Bible Online

LAW MA NIR-NIRAMNA 23 - Masana bible

LAW MA NIR-NIRAMNA 23

¹Hay li ma naŋ musawa ti fun hiɗi sa ma ŋolo, naŋ ma li ŋali hiɗi sle ma ka vokaŋu;

²naŋ ma gi kew delaŋu, la naŋ mi sa haram ŋolo.

³Naŋ ma niŋa ti ma jibetna valamɗi, kay kayni mi tin ma ɗutta.

⁴Vul lasta mi tuwaŋu kay muɗ farayɗi, tun vida vaŋu kay kaynɗi.

⁵Naŋ min cuk iraŋ kuɗ va ma vat goyna su? Kay farayna zlimitna valam ka'a, ki lay-ɓukana nala nam fok kulo'o dukalawna.

⁶Naŋ ma ti funa vi sa ma iram ɗuw joonɗi, naŋ ma niŋa tin ma jibetna valamɗi;

⁷kay varta vi dikamu ŋray ca ki nam nala, nam as daŋ ala taŋu caŋu; may dikam may hiɗi naŋ noŋ ne'ɗi.

⁸Naŋ ma vin zutoŋ ma naŋ ligimna goyo, law ma jibet ma naŋ dumna ma bays goy ɦawa'a.

⁹Naŋ ma di yoboyn hay hum sa ma ɦay-ɦaynɗi, kay nam ɗuw dita ta yalla vaŋ birek-ceke.

¹⁰Naŋ ma jok jaara ma ɓa-ɓana vi sinen goyɗi, naŋ ma kal kulo hay sinena vi sa kuyunɗi;

¹¹kay ma gutda visiya nam dono'o, nam kay tuwamu ma hulotsi goy hay ɓaŋu.

¹²Mal dikaŋ goyo tam hatta, mal humaŋ goyo tam yoboyna vi wida.

¹³Tel gatta goy kay goorgoorɗi, la naŋ watam hiɗi libetna, nam as mit deɗi.

¹⁴Hay li ma naŋ ka watam hiɗi libetna, naŋ ka hulot ciwta valam goy vun liyna vi mitta.

¹⁵Goora vanu, la dikaŋ ka yali, dikan nan kaw ma li firiya.

¹⁶Hayanu ma hob hiɗi firita, hay li ma vunaŋ di yoboy ma gasina.

¹⁷Hin dikaŋ var kay sa sulukŋ noŋɗi, narta vi Ma-Vatɗina ma li hayaŋu buurta kafe.

¹⁸Nala naŋ ma tuɗ vok ɗaw, cubta-sle'ta vaŋu ma vat goyɗi.

¹⁹Naŋu, goora vanu, humaŋu, muɗaŋ yali kaw, hin dikaŋ tam hagata vi ɗigerta.

²⁰Tap tuwaŋ hiɗi sa ci vinɗi, tap tuwaŋ hiɗi sa ti haramnaɗi kaw.

²¹Kay sa ma ɦoyay kuɗ vinna, hiɗi sa ma ti fun ŋolla muɗ hawi, sa ma kal sen puslurina ma cukum talam mi sligar jireɓiya.

²²Humaŋ vun buŋ ma vuɗaŋŋa, naŋ ma ɗuw suŋ birek-cekɗi, hay li ma na' muɗawa mari.

²³Gusaŋ gasita, may naŋ ma gusa' goyɗi, gusaŋ yalla, gatta hiɗi yamda-wida kaw.

²⁴Goor ma ɗigera bulum ka hay firita, sa ma vuɗ goor ma yalla hayam ma sleɗa.

²⁵Hin dik buŋu hiɗi suŋu li firiya, na' ta vuɗaŋga hina' dika' hob hiɗi firit ŋolda.

²⁶Goora vanu, vulan dikaŋu, tun iraŋ hay hagata vanu.

²⁷Kay cata gawlaŋga ŋray ca hiɗi zul-ma-wiŋŋa, cata pulta ŋray ca hiɗi kaar ma hebayna.

²⁸Na' gan gini'na ki sa ma coŋcoloŋŋa nala, sum sa ɦay-ɦayna na' biyasi hay nagat ŋolo.

²⁹Sum sa siwel yayyo! Kayn si sum sarige? Sum sa siwel haha! Kayn si sum sarige? Ci wayt kayn vi sum sarige? Pi lawt kayn si sum sarige? Ka tuw sumun goy mili bay lawta kayni si sum sarige? Sum sa irsi slaw keŋ' kayni si sum sarige?

³⁰Kayni si sum sa ba liyna visi tam vinna, kayni si nisi sa ci vin ma rigasayna.

³¹Vinna slaw keŋ' nam jifiy ŋolo, nam wile pirik' pirik' hay tasata, nam lig gaa goslaŋ golɓot ŋolo.

³²May naŋ ma ɗuwumɗi, hay dabta nam calaŋ ki guyn nala, nam calaŋ ki guy-makayn nala.

³³Nala nam ma muɗaŋ iraŋ kuɗ boy sa pulla, dikaŋ ma tun caw di sle ma gunina,

³⁴naŋ ma muɗ ki sa ma buri goy way niy-lumna waŋ nala, ki sa ma buri sene hay caw lumna nala:

³⁵Nisi tonu. may tuwan may tanɗi, nisi watanu, may nan wi kayni tan ɓislek noŋɗi. Nan ma zliy kulo lancitige? Nan min dolay mara lo.