Read Masana LAW MA NIR-NIRAMNA 24 Bible Online

LAW MA NIR-NIRAMNA 24 - Masana bible

LAW MA NIR-NIRAMNA 24

¹Naŋ ma niŋa sum sa joonɗi, tap hiɗi nisiɗi kaw.

²Kay diksi gara' ti ɓulakka, vunsi dum mi sle ma jiw-zlata.

³hiɗi yalla sem-ziyna tun gaa'a, hiɗi yamda-wida ziyn as col dono'o.

⁴hiɗi wida, hay ziy ma kalafna hob hiɗi sle ma ŋaana, hiɗi ma jifiyna kafe.

⁵Sa ma yalla gaŋeraŋa valam ŋolo, sa ma wida hobay hiɗi donota;

⁶kay naŋ ma li duura hiɗi yali, su'da may goy vi sum sa vul gatta sa ŋol dak-dakŋa.

⁷Yalda na' ɗuw jami kay sa ɦay-ɦayna, nam as di vunamu jar tokŋaɗi.

⁸Sa ma var kay li joota yum ala sa ma hobay hiɗi mileta.

⁹Varta ta ɦay-ɦayta mi suluku, sa ma panta nam jar sumun liwisi.

¹⁰La naŋ muɗ maŋaya hay buur ma makka, gaŋeraŋa vaŋu ti maŋayta kaw.

¹¹Sum sa nisi ka tansi vun mitta naŋ ma butsi goyo, sum sa nisi narsi kay ŋatsi goyo naŋ ma suɗsi goyo.

¹²La naŋ di ala: a'a, numa wi kaynɗi, sa ma fek dikga as wi kaynɗi su? Nam ma ŋom ciwta vaŋu as wi kaynɗi su? Nam ma vul mi gigekaw kuɗ lopna valamɗi su?

¹³Goora vanu, taŋ yumda, kay na' ŋaa'a, sotona vi yumda nam ŋaa'a hay vunaŋu.

¹⁴Nala kaw, garaŋ yalda kay ciwta vaŋu; la naŋ fa'awa, na' ma gutaŋ voko, cubta-sle'ta vaŋu ma ba goy waaɗi.

¹⁵Naŋ ma gan jawt vok sa ma ɗigera hiɗi dikga ta wastaɗi, liyn ma nam mus hayna naŋ ma ɦom gaaɗi kaw.

¹⁶Kay la sa ma ɗigera puk gaa sem siɗiya kaw, nam hot fok kulo'o, may sum sa sulukŋa zuti gaa hay joota.

¹⁷Naŋ ma li firi kay ni-gaata vi sa ma gaw kaŋŋaɗi, naŋ ma li firiɗi hay li ma nam nig gaa hay joota,

¹⁸kay hay li ma Ma-Vatɗina iram wi kayni, dikam ɗawn ma ɓulaka, ɦiyda valamu kay san kayni nam ma muɗa' dela'a.

¹⁹Naŋ ma ɓulak dikaŋ kuɗ sum sa li jootɗi, dikaŋ ma taŋ kuɗ sum sa joonɗi.

²⁰Kay sa ma li joota as na vokɗi, fitilla vi sum sa joona ma tew goyo.

²¹Goora vanu, laŋ nar kuɗ Ma-Vatɗina hiɗi mulla; naŋ ma tap hiɗi sum sa muɗ vaara visinɗi;

²²kay ɓulak-goyta visi ma co kisi gosoyo, kitata ta min co kay segena hiɗi segena, sa ma wa' ɗawni mi gige?

²³Tan kayni lo mi va ma may goy vi sa yalla pa: Ka ir sumuna vun kitata kayni may ŋaaɗi.

²⁴Sa ma di mi sa ma joon ala naŋ li hay liyamu, sa namna sumun ma ŋulumu, jaf-sumun ma beɗemu.

²⁵Nisi sa ka kitata kay sum sa jo'ona ma fi ŋaata, bolda ma co kisiya kay vulsi ŋaata.

²⁶Sa ma hot dit hay liya' ɗigera, nam mi sa ma fetaŋ yaŋ goyo.

²⁷Kotaŋ lopna vaŋ ma goy jiyna, vataŋ lopna vi sinena vaŋ kaf, bugol kayni inaŋ ziyna vaŋu.

²⁸Li di-goyta kay ɓasuŋŋa bay lawtaɗi; naŋ min ɗut hiɗi vunaŋ su?

²⁹Nam ma li tan nala, nan kaw min li talam nala naŋ ma di naɗi. Wurak mi gigekaw kuɗ lopna valam kayn mi nanu.

³⁰Nan jik kat sinena vi sa ma zulomda, nan jik kat sine gulda-guldana vi sa ma ɦay-ɦayna.

³¹Ɗuw kayni, gu-zigiyn ka si kulo hay liyn kaf, zigiy-olla ka hobi kay nagata, gulmun ma ini hiɗi hiɗiyna ka ɦoy gaa'a.

³²Nan ɗuw hiɗi ŋali, nan fi hatta kuɗ va ma nan wumu.

³³Naŋ min kal sen neɗe, naŋ min tun sukaŋ neɗe, naŋ min slew ɓaŋ war-digaŋ neɗe kay kal sene.

³⁴Nala hawta ma bowoŋu, ki sa ma cigeɗna nala, kiɗata ma co kaŋu ki sa ma duura nala.