Read Masana LAW MA NIR-NIRAMNA 25 Bible Online

LAW MA NIR-NIRAMNA 25 - Masana bible

LAW MA NIR-NIRAMNA 25

¹Tan kayni lo mi law ma nir-niramna vi Salomon, tapam si sumuna vi Ezekiyas mulla vi Yuda.

²Gajijita vi Lawna kayni kay ŋay slena; gajijita vi muliyan kayni kay fek slena.

³Ki dukalawna ka kulo gine'e, ki way nagata gaa zulu nala kaw, varta vi mulla ta san as feka'ɗita na' ki kayn nala.

⁴Slaŋ ir suɗoy-dooron goyo, nala naŋ ma yor dowayta,

⁵slaŋ ir sum sa joon goy vok mulla, nala zlamda-mulda valamu ma fi donota hiɗi ɗigerta.

⁶Subur tuwaŋ vok mullaɗi, mus hay liyna vi sa ŋulonɗi.

⁷Kay ŋaa'a kaŋu hay li ma nisi di taŋ ala: «jikaŋ kulo tani», suw kay ma nisi hotaŋ yaŋ gaa vok yerimana.[4]

⁸Naŋ ma kal hay ci-wayt koloyɗi, kay la li ŋalɗi, hay yam dabta vi lawta naŋ wi va ma naŋ liɗi, hay li ma sugolaŋŋa ŋulaŋawa.

⁹Colaŋ kay lawta vaŋu vok sugolaŋŋa, may pat dir ŋayayta vi sa mara goyɗi.

¹⁰Kay la nam humawa ni, nam ɗawn ma ŋulaŋu, semda vaŋ ta tiy goy joota ɗawn ma jor voko.

¹¹Ki ora moki hiɗi doorota nala, yoboyna ma dum kay kayni nam nala kaw.

¹²Ki jaɓna ma ora tapay hiɗi ganna vi ora ma beɗaya nala, sa ma jak humam tam sa ma yalla ma vul gatta kaw nam nala.

¹³Ki liyn ma sleɗay kuɗ tukŋa hay buura vi feɗna nala, sa ma giy sunu ma hob vun dita hay liya'na kaw nam nala; nam vul tun sukka mi ciwta vi mulamna.

¹⁴Sa ma subur tuwam hay vulda ta nam bay vula' goyta nam ŋray ca ki ɗugulla hiɗi simeɗna ma bay niyna nala.

¹⁵Fok ɦiy gosoyɗita girif mulla gaa vokaŋu, dita ta lumaɗta kus zokŋa.

¹⁶La naŋ fi yumdawa, naŋ ma ti'e kay hoba, kay la naɗi, naŋ hob cep-cep' ɗawn nam ma vin goyo.

¹⁷Tuɗ vo vi sugolaŋ tum-tumɗi, kay la nam makawa kaŋu, nam ɗawn ma kaŋ gawi.

¹⁸Ki kup-kupna, kew-gaferaŋa hiɗi ɓaraw ta siya' hilew-hilewta nala, sa ma li di-goyta ta sinda kaw nam ki kayn nala.

¹⁹Ki siyna ma goy toyo hiɗi gayna ma dirlayna, sa ma tun vida valamu kay sa ma ɦay-ɦayna hay buura vi sum-zlata nam ki kayn nala kaw.

²⁰Sa ma fok sligar ma talamna goyo hay liyna vi sleɗna, sa ma ɦok futura hay vun milla, hiɗi sa ma gi nulla tam sa ma vun yorta nisi ŋray ca.

²¹La sa ma gawt kaŋŋa mayt ka cumu, vulum va ma ti'e; la laat ka lumu, vulum niy ma ci'e.

²²Kay hiɗi kayni naŋ ma tok veŋ ma kuta kulo kalamu, nala Ma-Vatɗina ma wurakaŋu.

²³Simeɗ ma may gal gaana mar niyna, nala kaw sinda ta di slen goy ŋayaya ɓulak dikga.

²⁴Ŋaa'a kay mus goy gef-ziyna suw musta hay ziyna hiɗi cata nefta.

²⁵Labar ma ŋaana ma may goy gine pana nam ŋray ca hiɗi niy ma sleɗna, ma vulum mi sa ma may goy makay pana.

²⁶Niy kaara ma durgusi kulona hiɗi kaata ta niyna va' joota, kayni ŋray va ki sa ma hin tuwam li nar vok sa ma joona nala.

²⁷May ŋaa'a kay ti yumda ŋolɗi, may kay gar suburta vi sum segena kayni vul sli yam kulota.

²⁸Sa ma gaŋeraŋa valam hay ɓam sa mara'a, nam ŋray ca ki hoyok-ziy ma gulmun ŋuyi talamɗina nala.