Read Masana LAW MA NIR-NIRAMNA 26 Bible Online

LAW MA NIR-NIRAMNA 26 - Masana bible

LAW MA NIR-NIRAMNA 26

¹Ki tukŋa ma hay cayda nala, ki niy ma si hay liyna vi feɗna nala, ki kayn nala kaw gajijita na' may nagay dik sa ma ɦay-ɦaynɗi.

²Ki layta pir goyo nala, ki lay-ŋusna fok nala, be'da ta hay hagata va'ɗita na' li va noŋ ne'ɗi kaw.

³Libetna nam koti kay kulumna, jamana nam koti kay kurona, tilekŋa kaw nam koti kay ŋor sum sa ɦay-ɦayna.

⁴Naŋ ma hot dit tam sa ma ɦay-ɦayna kuɗ ɦoyta valamɗi, kay naŋ kay tuwaŋu ma li ki nam naɗi.

⁵Hotaŋ dita tam sa ma ɦay-ɦayna ki nam ɦoyay nala, kay nam ma ɗuw tuwam ki nam yali naɗi.

⁶Sa ma di sunda vun sa ma ɦay-ɦayna nan ka ka gayam goyo, nam ka ci bay-ɗigerta.

⁷Yoboyn ma hay vun sa ma ɦay-ɦayna nam ŋray ca ki gay ma dirlayna ma maŋayna nala.

⁸Sli yam sa ma ɦay-ɦayn kulo'o, kayni ŋray ca ki jun hiɗiyn vun tiwlekŋa nala.

⁹Ɓakŋa hay vun sa ma ɦay-ɦayna, kayni ŋray ca ki sa ma ɦoyay ki vinna ma zigiyn ka ciy way-ɓalam zaw nala.

¹⁰Sa ma cuk sum sa ɦay-ɦayna hiɗi sum sa min capna vokomna, nam ŋray ca hiɗi sa ma gi ɓarawta ma ka tuw sumun kaf goy mili nala.

¹¹Sa ma ɦay-ɦayna hot kay ɦoyta valamu, ki diyna hot ti vinna valamu nala.

¹²La naŋ fi sa ma ɗuw tuwam kir tuwam yali, naŋ as zam ɓam sa ma ɦay-ɦayna suwum namu.

¹³Sa ma zulomda di'e: Zlon ka goy hay hagata, zlon ka hay hagana vi hoyok-ziyna.

¹⁴Sa ma poyna ɦir gaa hay zlatta valamu, ki cokoromna ɦir kat vun-ziyda nala.

¹⁵Sa ma poyna kal ɓalam gaa hay ŋalayta, nara' kulo vunam kayni makamu.

¹⁶Sa ma zulomda ɗuw tuwam yali, suw sumun siɗiya sa hot dit hay liya'a.

¹⁷Sa ma jik hay hagata, may kal tuwam hay ɦiyna, nam ŋray ca hiɗi sa ma mok diyn hay humamna nala.

¹⁸Ki sa ma muɗi ɦiy ŋolo yak kut kulo'o, gi ɓarawt goyo, kay ci-goyta nala,

¹⁹sa ma ɗut sugolomu, may nam di ala kayni mi zah ɦawa'ana, nam kaw ki kayn nala.

²⁰Gun la mayɗi, kuta tew goyo, nala kaw, la sum sa ka sinda sayɗi, nefta kaw tayɗi.

²¹Sa ma gar cirepta fok ci-wayta, ki veŋŋa vi kut kulo'o, ki guna ɗok kut kulo'o nala.

²²Yoboyna vi sa ma ka sinda ki ti ma jibetna nala, nam kal ta-ta gaa hay ruwat sana.

²³Dita ta galakka hiɗi dikga ta joota ŋray ca ki suɗoy doorona ma koray tam doway ma nagana nala.

²⁴hiɗi vunamu sa ma ka gawta jok tuwamu, nam tun ɗutta hay dikam kalafi.

²⁵Hay li ma nam di delem ma lumaɗna, naŋ vi kuɗumɗi, kay liwista ka kalaf hay dikam siɗiya.

²⁶La nam ŋay gawta hay dikam kalafi, joota valamu ma ɗek tuwa' goy hay tokŋa.

²⁷Sa ma jugoɗ zulda hot nig gaa haya' mi namu, sa ma ligat hiɗiyna hiɗiyn hot kirapam gaa'a.

²⁸Dita ta sinda ka gaw hiɗi sum sa na' kirapsi gaa'a, vun ma ɗutta mar ɓulak-goyta.