Read Masana LAW MA NIR-NIRAMNA 27 Bible Online

LAW MA NIR-NIRAMNA 27 - Masana bible

LAW MA NIR-NIRAMNA 27

¹Subur tuwaŋ kay buur ma grawtnaɗi, kay va ma buurta ma vulumna naŋ wumɗi.

²Hin sa hena suburaŋu, may naŋ ma subur tuwaŋ hiɗi vunaŋɗi, hin sa ma pulla di va ŋaa'a kaŋu, may mi naŋ kay tuwaŋɗi.

³hiɗiyn ci neke, ŋesln ci neke kaw, may ɦiyda vi sa ma ɦay-ɦayna ci nek suwum ma' pete.

⁴Waskayta ci mati, ɦiyda hiwir liyn ŋolo, may sa ma as col vok hunayta mi gige?

⁵Lawt fok goy jaray haraŋ kayni marya, suw bonota ta hiɗi mileta.

⁶A sa ma gawta fetaŋ yaŋ goyo ni, marya banaŋ ma minaŋŋa kaŋ tuwaŋ goy mili.

⁷Sa ma hayam hobayna tay yumda gaa kuɗ selemu, may sa ma mayt cumna va ma galakŋ kaw kiram jibete.

⁸Sa ma tulur goy gine hiɗi ziyna valamna, ŋray ca ki layta tulur tam tokosayna va' nala.

⁹Mula hiɗi urdina firi dikga, nala kaw gatta vi banaŋa ta hiɗi minda na' sleɗ ŋolo.

¹⁰Banaŋa hiɗi bana buŋŋa naŋ ma noysi goyɗi, lo hay li ma naŋ ka vun zlata, naŋ ma kal hay ziyna vi ɓasuŋŋaɗi; niraŋŋa ma musi goboy hiɗi naŋŋa suw ɓasuŋ ma musi goy gine hiɗi naŋŋa.

¹¹Goora vanu, la naŋ yali, dikan ma li firiya, nala nan ma hot dita tam sa ma min muɗan zulona.

¹²Sa ma yalla wi joota, nam ŋay tuwamu, may nam ma ɦay-ɦayna jik ka'a, nam fi bakmarana.

¹³Yawaŋ sligara valamu, kay nam col tuwam hay baŋal sa mara'a, yawaŋ sle ma deŋŋa hay ɓalamu, kay nam col tuwam hay baŋal sa pulla.

¹⁴La san gi bol kay sugolomna hay graw culum culum, hiɗi delem kulo ŋolo ni, kayni ŋray ca ki nam ka beɗem nala.

¹⁵Cata ta vunna, hiɗi ziy ma suta hay buur ma niyn sina nisi ŋray ca.

¹⁶Sa ma min tela'a ŋray ca ki nam ka tel simeɗna nala, ki nam ka vi mula hiɗi ɓalam nala.

¹⁷Ki kawayna ligaɗ siy kaway hena nala, san as fok ɦiyda vi niramna kulo'o ki kayn nala.

¹⁸Sa ma kot tuw gu-gumna ma tum vuɗamu, nala kaw sa kot tuw mulamna ma fi suburta.

¹⁹Ki san ɗuw ir tuwaŋ goloŋ hay niyna nala, dikga vi sana kaw na' hot dita tam dikga vi sana ki kayn nala.

²⁰Liyna vi mitta hiɗi zul ma wiŋŋa hayam as hobɗi; nala kaw ira vi sana as hob kay ɗuwnɗi.

²¹Ora yorom hay fuura, doorota yora' hay zulla, may sana kitat ka kalam ɗawni kuɗ selem ma tiyna.

²²Sa ma ɦay-ɦayna la naŋ ɗuwum hay zuwna, ki cat duw wana hiɗi goor-zuwn nala kaw, ɦay-ɦayta valam ta talamta as pulok goyɗi.

²³Naŋ ma wi fok-dimina vaŋ goy kalam kep kep ŋaa'a, naŋ ma kot tuw farayna vaŋu.

²⁴Kay farayna mus ta-ta hay vatɗitɗi, gaŋeraŋa as mus ta-taɗi kaw.

²⁵Hosona as ŋal goyo, goɗna vurnaya, us ma kay hiɗiyna zamis kulo'o.

²⁶Fok-dimin ka kayni kay gan tuwaŋ hiɗi namu, fok-meen ka kayni kay naŋ li lop sinen hiɗi namu.

²⁷Miira vi fok-meena as kay tina vaŋu, hiɗi ziyna vaŋu, kay ti boy sa sunda vaŋu kaw.