Read Masana LAW MA NIR-NIRAMNA 28 Bible Online

LAW MA NIR-NIRAMNA 28 - Masana bible

LAW MA NIR-NIRAMNA 28

¹Sum sa joona mun jaŋi bay sa digiɗsiya, may sum sa ɗigera tuwsi wirsiɗi ki zlo joriyona nala.

²Hay li ma nagata ka vun duura, Sum sa ŋulona va'a ka dak-dak, May mulla ma ka hiɗi wida hiɗi yalla, mulda valam mus ta-ta.

³Sa ma hawna ma curoɗ sum sa vun lasta nam ŋray ca hiɗi niy ma si ŋolo may mar kiɗata nala.

⁴Nisi sa noy vun-ma-gatna goyna ka vul suburta tam sa ma joona. May nisi sa li kuɗ vun-ma-gatna ka muɗ ɦiy talamu.

⁵Sum sa tuwsi vuli goy tam joota as hum va ma ɗigeraɗi, may nisi sa gar Ma-Vatɗina hum caw slen kafe.

⁶Sa ma hawna ma poy hay ɗigerta, nam ŋaa'a suw sa ma faraya may hagata valam guniya.

⁷Sa ma li kuɗ vun-ma-gatna nam mi goor ma yali, may goor ma poy hiɗi sum sa viyuwna mar zulota kay bulumu.

⁸Sa ma tok farayna hiɗi niyam kuɗumu, hiɗi haramda nam tokom kulo kayni kay sa var kay sa hawna.

⁹La san muɗ humam goyo kay hum kuɗ gattaɗi, siɗawta valam kaw liwisi.

¹⁰Sa ma cal sum sa ɗigera goy hay hagata gunita, nam ma nig gaa hay zul ma nam jugoɗomna. May sum sa ɗigera ma yaw ŋaata-ŋolda voco'o.

¹¹Sa ma farayna ɗuw tuwam yali; may sa ma hawna ma ka hiɗi wida as fekemu.

¹²Hay li ma sa ɗigera kolawa, kayni ti gajijita ŋolda; hay li ma sa joon kolawa, gigekaw gar kay ŋaya.

¹³Sa ma ŋay sulukŋa valamu as wul vokɗi, may nam ma ham sulukŋa valam goyo, noyom goyo kaw, nam ma fi slugota.

¹⁴Sle'ta ka kay sa ma mus dok-dok hay narta, may sa ma so'otayna ma nig gaa hay joota.

¹⁵Sa ma joona ma ka ti mulu kay sum sa hawna, nam ŋray ca ki zlona ma ka ci gumu, hiɗi ursena ta mayt ka cum nala.

¹⁶Mul ma bay-yalla li lop ma curoɗ sumuna ŋolo, may sa ma gaw hiɗi fita ta bay-ɗigerta ma mus ta-ta.

¹⁷Sa ma busuw sa hen tuni kalamna jaŋ ta-ta gaa hay zulda: Hin sa telemɗi.

¹⁸Sa ma poy hay dikga ɗigerta ma fi su'da, may sa ma sli hagata gunita ma' pet ma nig gaa hay ta kepta.

¹⁹Sa ma zum sinena valamu hayam ma hob hiɗi tina, may nam ma tuɗ kuɗ sle ma waana ma hob hiɗi hawta.

²⁰Sa ma ɗigera ma fi bolda. May sa ma min muɗ faray koloyo ma fi gat-vunda.

²¹May ŋaa'a kay poŋ ir sumunɗi, kay slurguɗum fun ne' ɦawa, san as kal tuwam hay sulukŋa.

²²Sa ma niŋa slena gar kay muɗ faray koloyo, nam may wi ala kiɗata ma co kalamuɗi.

²³Sa ma di sumun kirsina fi slugot bugol kayni, suw sa ma vunam ka hiɗi ɗutta.

²⁴Sa ma kul bulumu hiɗi sulumu, may bugolda nam di ala kayni may mi sulukɗi, namu mi nir sa ma ɓulak slena.

²⁵Sa ma dikam min slen ŋolla mar ci-wayta, may nam ma hin tuwam hay ɓam Ma-Vatɗina hoba.

²⁶Sa ma var kay tuwam nam toŋŋa mi sa ma ɦay-ɦaya, may sa ma poy hay yalda ma suɗ goyo.

²⁷Sa ma vul slen mi sa hawna kiɗata as fumɗi, may nam ma duk iramu hob hiɗi be'da.

²⁸Hay li ma sum sa joona fok kulo'o, gigekaw gar kay ŋaya; hay li ma nisi mit goyo, sum sa ɗigera biya ŋolo.