Read Masana LAW MA NIR-NIRAMNA 29 Bible Online

LAW MA NIR-NIRAMNA 29 - Masana bible

LAW MA NIR-NIRAMNA 29

¹Sa ma nagay kay gatta, may so'ot dikamu, nam ma mit gosoyo bay gurgunu ma muɗum ŋaa'a.

²Hay li ma sum sa ɗigera biya'a, sumun ka hay firita; hay li ma sa ma joon ka ti mulda, sumun kaf tiya.

³Goora ma min yalda li dik bulum firiya, may nam ma poy hiɗi boy sa viyuwna ɓulak farayn goyo.

⁴Mulla muɗ nagat dono'o hiɗi ɗigerta, may nam ma yaw slen hay ɓam sumuna ɦo nagat gaa'a.

⁵Sa ma ɗut ɓasulumna ka gan jawt gaa vokomu.

⁶Jawta ka gani hay sulukŋa vi sa ma joona, may sa ma ɗigera ma kola, ma li firiya kaw.

⁷Sa ma ɗigera wi maŋayta vi sa hawna, may sum sa joona wida visi mayɗi.

⁸Sum sa burahta fo kuta hay hoyok-ziyna, may sum sa yalla tun ɦiyd gaa'a.

⁹La sa ma ɗigera ci way hiɗi sa ma ɦay-ɦayna, nam as muɗ ɦiya, as muɗ cen kaw, may nam fi tun-sukkaɗi.

¹⁰Sum sa ɦok busuwna gaw hiɗi sa ma ɗigera, may sum sa ɗigera ŋom irita valamu.

¹¹Sa ma ɦay-ɦayna ŋayayta valam mayɗi, may ma yalla ŋom ŋayayta valamu.

¹²Hay li ma mulla tun ŋalda valam tam yoboy ma sinna, sa sunda valam kaf si sum sa joo'o.

¹³Sa ma hawna hiɗi sa ma curoɗ sumuna fi tuwsiya; sa ma malsi irsi goy ma' petna mi Ma-Vatɗina.

¹⁴Mulla ma ka kitata vi sum sa hawt hay liya'na, zlamda-mulda valamu ma col dono dok-doko.

¹⁵Zugulda hiɗi watta vul yalla, may goor ma vokom hini siriŋŋa muɗ sulum zulo'o.

¹⁶Hay li ma sum sa joon biyawa, sulukŋa jor voko; may sum sa ɗigera ma ɗuw cuk-gaata vi sa joon hiɗi irsiya.

¹⁷Gataŋ goora vaŋu, nala nam ma vulaŋ tun-suku, nam ma vul sle'ta mi ciwta vaŋu.

¹⁸Hay liyn ma sle ma vul tuwam kir sa jobta may loɗi, sumun tupa kay tuwsiya; sle'ta kisiya la nisi li kuɗ gatta.

¹⁹Gat sa ma gorvona hiɗi yoboyn ɦawaɗi, kay la nam hum dita kaw, nam may hot yalam gaaɗi.

²⁰La naŋ wi sa'a di yoboyn bay varta, sa ma ɦay-ɦayna ŋaa'a suwumu.

²¹Sa ma gorvona la naŋ hatawa giɗelem delem hay joriyota valam pa, hay dabta nam muɗ ɗuw tuwam ki nam mi goor ma vuɗiya nala.

²²Sa ma ci wayta fok ɦiyd kulo'o, sa ma jiw-zlata mar ci-matta ŋolo.

²³Sa ma subur tuwamna yalam ma hot gaa'a, may sa ma hot yalam gaana fi gajijita.

²⁴Sa ma ɓuraw slen hiɗi sa ma kulla ka ka gaw hiɗi ciwta valamu, nam wi be'da, may nam di goyɗi.

²⁵Narta vok sumuna gan jawta, may nam ma vi hay Ma-Vatɗina ka ŋomiya.

²⁶Sumuna ŋolo gar kay fi slugota vok ir mulla, may kitata ta gasita may vi Lawn pa.

²⁷Sa ma slugut kitata nam liwisi kay sum sa ɗigera, sa ma hagata valam ɗigera nam liwisi kir sum sa joona.