Read Masana LAW MA NIR-NIRAMNA 3 Bible Online

LAW MA NIR-NIRAMNA 3 - Masana bible

LAW MA NIR-NIRAMNA 3

¹Goora vanu, yaŋ ma jok hatta vanɗi, naŋ ma ŋom dita vanu,

²Kay kayni ɦur buura hiɗi busata vi irita vaŋu, kay kayni ma vulaŋ sle'ta suwa.

³Kay ŋaata hiɗi ɗigerta ma noyaŋ goyɗi, naŋ ma gaɓam kulo kelaŋu, naŋ ma ɗom hay tablena vi dikaŋu.

⁴Nala naŋ ma fi slugota hiɗi varta ŋaata, vok ir Lawna, vok ir sumuna kaw.

⁵Vul tuwaŋ hay ɓam Ma-Vatɗina hiɗi dikaŋ kaf, tun ŋalda vaŋ kay yalda vaŋɗi;

⁶Naŋ ma wumu hay hagata vaŋ kafe, nala nam ma par hagata vaŋ goyo.

⁷Naŋ ma ɗuw tuwaŋ ki naŋ yali naɗi, may laŋ nar kuɗ Ma-Vatɗina, calaŋ goyo kay joota.

⁸Kay kayni mi va ma vul yerta-goyta mi tuwaŋu, kay kayni ma sleɗaŋ zokaŋu kaw.

⁹Slaŋ yam Ma-Vatɗin kulo'o hiɗi farayna vaŋ kaf, hiɗi vun-jaf ma jewna vi sle ma naŋ fumna kaf,[1]

¹⁰Ki kayn nala feera vaŋ ma hob hiɗi slena, doway-firina vaŋu ma hob hiɗi vin ma jibetna.

¹¹Goora vanu, naŋ ma ɗuw gatta vi Ma-Vatɗin birek-cekɗi, naŋ ma li nari kay watta valamɗi kaw;

¹²Kay Ma-Vatɗina wat sa ma nam minimna, ki bumna wat goor ma dikam kalamna nala kaw.

¹³Sle'ta ka kay sa ma fi yaldawa, sle'ta ka kay sa ma ka hiɗi wida-yalla kaw.

¹⁴Kay sle ma san fum kuɗ kayni suw doorota, faytana ma san fum kuɗ kayni suw ora;

¹⁵nam ŋaa'a ŋolo suw kermena, nam tek ŋolo suw sle ma gusta valam ŋolla.

¹⁶Hay ɓalam ta jufta irita ta mus ta-tata ka'a, hay ɓalam ta gulda farayna hiɗi gajijita ka'a kaw.

¹⁷Hagata valamu ti hagata ta ŋaata, hagata ta gurayta valamu kaf mar sle'ta.

¹⁸Na'a mi guna vi irita kay nisi sa va'a, nisi sa fa'awa haysi sleɗiya.

¹⁹Ma-Vatɗina kot nagat kayni hiɗi yalda, nam tun sem dukalawn gaa kayni hiɗi yamda-wida.

²⁰Vun-zul ma wiŋŋa mali goy kayni kuɗ yal ma ŋolla valamu, ɗugulla toɗ maɗayn gaa kayni kuɗ yalla valamu.

²¹Goora vanu, hatta kayni hina' tuɗ goy gine hiɗi naŋɗi, ŋomaŋ yalla hiɗi varta:

²²Nam ma vul irita mi ciwta vaŋu, nam ma muɗ mi ganta ta kelaŋu.

²³Nala naŋ ma poy goy butiya hay hagata vaŋu, seŋ ma tupa tam vaɗi.

²⁴La naŋ burawa gaa'a, tuwaŋ li narɗi, hay li ma naŋ burawa gaa'a, naŋ ma kal sen hiɗi sle'ta.

²⁵Tuwaŋ ma li nar kay va ma co kaŋ tukusinaɗi, tuwaŋ ma li nar kay mot ma sum sa joona ma motaŋŋaɗi;

²⁶kay Ma-Vatɗina ma lin mi sa ma ŋomda vaŋu, nam ma ŋomaŋ seŋu kay dugumna marige kaf.

²⁷Naŋ ma tel kay li ŋaata tam sa ma nagay ka'naɗi, hay li ma gaŋeraŋa vaŋ ka'a kay lum ŋaata.

²⁸La va ma naŋ vul mi sugoloŋŋa ka'a, naŋ ma dum ala tuɗaŋu hotaŋiya, nan ma vulaŋga grawta naŋ ma dum naɗi.

²⁹Hay li ma sugoloŋŋa ka musi galaŋ ŋal kiliŋ damna, naŋ ma var va ma joo kalamɗi.

³⁰La san bay laŋ va ma joo'o, naŋ ma ci way hiɗi nam goy waa ɗarɗi.

³¹Naŋ ma tun varta vaŋ kay sa ma waskaynɗi, naŋ ma sli hagata valam tara kep noŋɗi'

³²Kay Ma-Vatɗina ka gaw hiɗi sum sa joona, may namu mi bana sum sa ɗigera.

³³Be'da vi Ma-Vatɗina ka vo hay ziyna vi sum sa joona, may nam gi bol kay ziyna vi sum sa ɗigera;

³⁴Nam cen kuɗ sum sa burahta, may nam li slugot mi sum sa hot yisi gaana;

³⁵Sum sa yalla ma yaw gajijit voco'o, may sa ɦay-ɦayna ir ɓurawta visi ti zulota.