Read Masana LAW MA NIR-NIRAMNA 30 Bible Online

LAW MA NIR-NIRAMNA 30 - Masana bible

LAW MA NIR-NIRAMNA 30

¹Yoboyna vi Agur, goora vi Yake. Dita valamu kay sa ma yum Itiyel hiɗi Ukal.

²Gasiya, nan ɦay-ɦaya suw san gigekaw, yamda-wida vi sa-wurana may kanɗi;

³nan may hatay yaldaɗi, nan may wi wida vi sa peldetnaɗi.

⁴Nam ma jik kulo hay wuralawna, hot jikay gaa'a nam mi gige? Sa ma mok simeɗna hay ɓalamu nam mi gige? Sa ma ɗut niyna hay sligara valamu mi gige? Sa ma ŋaɓ sin-nagata mi gige? Sa namna yum anige? Sem goora valamu ya' anige? Naŋ wum su?

⁵Yoboyna vi Lawna kaf waki wak', namu mi marayta vi nisi sa gar kay tuwsi talamu.

⁶Cuk va vun yoboyna valamɗi, kay la li naɗi nam ɗawn ma gataŋu, naŋ ma muɗ ki sa ma sinda nala.

⁷Nan min jobaŋ kay slen ma': telem goy kanɗi jew mitta vanu!

⁸Gaŋ ir ɗutta hiɗi sinda goy gine hiɗi nanu, naŋ ma lan goy haw co'-co'ɗi, lan faray zututɗi kaw, vulan tina ma nan as ŋom tuwan hiɗi namu tuta.

⁹Kay ta ala: la nan faray ŋolo, yan ma jokaŋu, nan ma di ala Ma-Vatɗina kayn mi gige? Lebo la nan hawi, nan ma cap goy kula, semda vaŋ muɗ kiran puru.

¹⁰Naŋ ma ŋul sa ma gorvona vun mulamnaɗi, kay la naɗi nam ɗawn ma ŋulaŋu, naŋ ma muɗ joo'o.

¹¹Jaf mara ka'a, ma ŋul busiya, May subur susiɗi,

¹²Jaf mara ka'a ɗuw tuwam peldete, may bay por goyo kay liwista valamu.

¹³Jaf mara ka'a sli yam tuwam kulo'o, vokom kulo tuni tiriŋ'.

¹⁴Jaf mara ka'a siyam hiliw-hiliw' ki kew-gaferaŋa nala, kay vat sum sa joona goy kay nagata, kay vat sum sa hawna goy jar sum-wurana.

¹⁵Nulɗayna gurona valam ka ma': yisi ala vula, vula! Slen ka ɦidi hayam may hobɗi, sle hena ka fiɗi, nam may di ala asaya noŋɗi:

¹⁶Sle namna kayni: liyna vi sa mitina, cata ta getayta, nagata ta hob hiɗi niy noŋɗita, kuta, ta di ala asaya noŋɗita.

¹⁷Sa ma burah bulumu hiɗi sa ma ɗuw gatta vi sulumu birek-ceke, gaw-gawna ma kel lokŋa ma com iramu, gurona vi bakŋa ma mutumu.

¹⁸Slen ka ɦidi nam suwan yanu, slen ka fiɗi noŋo ma nan wum cawamɗina:

¹⁹Baŋal bakŋa hay dukalawna, baŋal guyna kulo kay hiɗiyna, baŋal lumna goloŋ kay niyna, baŋal sana vo hay ziyna vi goot-cata.

²⁰Cata bulota kaw hagata va' ki kayn nala: Na' ti'e, bugolda ɦas vuna' goyo, bugolda na' di ala: Nan may li joo noŋɗi.

²¹Slen ka hiɗi nam wir nagata; slen ka fiɗi noŋo ma nagata as ziyimɗi:

²²Gorvona ma co a ti mulu, sa ma ɦay-ɦayna ma co a fi fu ma tina,

²³cata ta viyuwta ta co a sli jufu, gorvota ta co a yaw vocona vi mula'ta.

²⁴Gaa kay nagata muuriyan ka fiɗi nam guray suw kafe, may yalla valam suw kafe;

²⁵telella, sle ma donota valam mayɗi, may tok tina valam kulo hay cayda.

²⁶Kosomna mi sle ma dono valam mayɗi, may jugoɗ zulla kulo jar hiɗiyna;

²⁷Baara mulla valam mayɗi, may tuɗ kuɗ tuwam hay vokŋa vokŋa;

²⁸huɗoŋolla, san as vum hiɗi ɓam ɦawa, may ɦarmat kalaf hay deŋel ziyna vi mulla.

²⁹Slen ka hiɗi tu'da valam jifiy ŋolo, slen fiɗi lo ma giɗay ŋaa'a ku'u:

³⁰Zlona, mulla vi muuriyana, deŋ goy ŋorom merɗek kay va noŋɗi;

³¹kulumna ma ganay ŋaana, lebo ɦu-ŋekŋa; hiɗi mulla ma sa col digamɗina.

³²La naŋ ka hobay hiɗi suburta, lebo la naŋ ka hiɗi darta joota, ŋaat tel tuwaŋu.

³³Kay miira ma gujomna vul mula, cinna ma mokom ɗeŋŋa vul busuwna, kay ɦiyda ta ɗeŋga mar cirepta kaw.