Read Masana LAW MA NIR-NIRAMNA 31 Bible Online

LAW MA NIR-NIRAMNA 31 - Masana bible

LAW MA NIR-NIRAMNA 31

¹Yoboyna vi mulla Lemwel, dita ta sulum hatam hiɗi na'ta.

²Nan ma daŋ mige goora vanu? Nan ma daŋ mige goor ma nan vuɗaŋŋa. Nan ma daŋ mige goora van ma nan minaŋŋa?

³Vul donota vaŋ goy tam boynɗi, hin hagata vaŋu hay ɓam nisi sa ba muliyan goynɗi.

⁴Humaŋu Lemwel, may ŋaa'a kay ci dolaynɗi, may naa'a kay muliyana kay ci dolaynɗi, may ŋaa'a kay gurona vi muliyana kay ci dolay ma galakŋɗi,

⁵kuɗ ta ala hay li ma nisi ci dolaynawa yisi jok vun-ma-gatna, nisi ɗawn ma ɓulak hagata vi sa maŋayna.

⁶Vulgi dolay ma galakŋa mi sum sa ka mit goyo, vulgi vinna mi nisi sa yorta ka hay diksiya;

⁷hinsi ci'e kay yisi ma jok hawta visiya, kay humsi ma gisi kay zumalda visi loɗi.

⁸Mal vunaŋ goyo, kay gut sum sa vunsi dugunna, kay gut kuɗ sum sa noyay goyna.

⁹Mal vunaŋ goyo, kaaŋ kitata hay hagata va'a, gutaŋ kuɗ sa hawna hiɗi sa maŋayna.

¹⁰Sa ma fi cata ta ŋaata ɗawni mi gige? Kay cata ŋaata na' suw faray ma kisna.[5]

¹¹Jufa'a ŋalda valam tuni ka'a, sle ma tina may kiɗa goy ka'ɗi.

¹²Na' lum tam jufa' mi sle ma ŋaana, may mi sle ma joonɗi, kayni hay buura vi irita va' kafe.

¹³Na' cilim tilisna hiɗi gudoŋŋa, na' li lop hiɗi dika' firiya.

¹⁴Na'a ki lumda ta filiwna nala, funa va'a na' maramay goy gine pa.

¹⁵Na' fok kulo hay ŋarpita pa, vul tina mi ziyna va'a, vul lopna mi boy sa sunda va'a.

¹⁶Na'a var kay sinena, fum kaw; kuɗ vuɗna vi lopna va'a, na' pi gulda-guldana.

¹⁷Na' jun fura' hiɗi dono'o, na' vul donot mi ɓa'a.

¹⁸Na' wi ala sle ma na' lumna kira' ŋaa'a, fitilla va'a may tew goy henjetɗi.

¹⁹Na' tun ɓa' kay va ma duɓar barawna, cita-ɓa'a ka perwet gu ma kuɗumna may.

²⁰Na' meɗ ɓa' goyo kay vul mi sa hawna, na' meɗ ɓa' goyo kay vul mi sa maŋayna.

²¹Na' may li nar kay sleɗna hay ziyna va'ɗi, kay sa vo hay ziyna va' kaf ka cuki hiɗi sligar ma diɓilikŋa.

²²Na'a cil gudoŋŋa, na' cil sligar-barawna, hiɗi purpella.

²³Jufa'a selem tiy goy fara'a, hay li ma nam mus jar sa maariyana vi nagata.

²⁴Na' cil semisna, gusum goyo, na' gus kantin goyo mi sa li filiwna.

²⁵Na'a hobay hiɗi donota hiɗi suburta, tuwa' may li nar kay sle ma min li vokŋaɗi.

²⁶Na' mal vuna' goyo hiɗi yali, hatta ta ŋaata ka hay vuna'a.

²⁷Na' coli jigere kay sle ma ka li vo hay ziyna va'a, na' may ti fun ma zulomdaɗi.

²⁸Gurona va' yaw kulo'o, da' ala sle'ta kagu, jufa' fok kulo, nam subura'a.

²⁹Guro-boyn ŋolo ka hiɗi poyta ŋaata, may naku, nak suwsi kafe.

³⁰Law ma ŋaan mi ɗutu, jifiyt vat goy ɦawa'a kaw; may cata ta li nar kuɗ Ma-Vatɗina na' ma fi suburta.

³¹Na' as fi wurakŋa kay lopna va'a, sum sa hay nagat kaf tiya' se' a kay lop ma na' lumna.